«2017 jylǵy 17 qarashada «Qazaqstan blokcheın jáne krıptovalıýta assosıasııasy» zańdy tulǵalar birlestigi quryldy. Birlestik Qazaqstan ekonomıkasyna blokcheın tehnologııasyn sheteldik ozyq tájirıbelerdi qoldana otyryp engizý úshin qurylǵan bolatyn. Onyń maqsaty – elimizde blokcheın tehnologııasyn ilgeriletý jáne biriktirý. Assosıasııa krıptovalıýta naryǵyn jáne ICO-ny zańdastyrý baǵytynda qazaqstandyq retteýshilermen jumys isteýdi josparlap otyr. Sondaı-aq blokcheın tehnologııasy zańnamalyq bastamalardy ázirleýmen qatar, iri jobalardy iske asyrý barysynda assosıasııa músheleriniń kúsh-jigerin jumyldyrý boıynsha jumys júrgizetin bolady. QBKA quramyna medısına, qarjy, ınjınırıng salalarynda blokcheın jobalardy engizbekshi bolyp otyrǵan Medelement, SanskrIT, Asyl Tobe, Tehsol Injınırıng jáne basqa da qazaqstandyq jetekshi kompanııalar kirdi. Qazirgi tańda birlestikke qatysýǵa nıet bildirgen tulǵalardan aı saıyn otyzdan astam ótinish túsip otyrady», dedi E.Býtın.
Sondaı-aq ol osy qysqa merzim ishinde QBKA AHQO-men yntymaqtastyq týraly kelisimge kelip, ózara túsinistik jóninde memorandýmǵa qol qoıǵanyn jetkizdi.
«Ońtústik Koreıa astanasy Seýlde ótken halyqaralyq blokcheın-konferensııa aıasynda QBKA blokcheın ındýstrııasyn ilgeriletý jónindegi Koreıa assosıasııasymen yntymaqtastyq týraly kelisimge qol qoıdy. Osy memorandýmdar aıasynda taraptar kelesi baǵyttar boıynsha yntymaqtastyq qurýdy qajet dep tapty. Olar qarjylyq tehnologııalar, jasyl qarjy, aktıvterdi basqarý, ınvestısııalyq kraýdınvestıng ortany damytý, ICO jáne kraýdfandıng, blokcheın tehnologııasy», dedi ol.
Raýan QAIDAR,
«Egemen Qazaqstan»
