«Egemen Qazaqstannyń» arnaıy jobasy: Jasampazdyq jemisteri
Jıyrma jyldyń ishinde atqarylǵan ıgi isterdiń arqasynda árbir óńirimiz ózgerip, ómirimiz jaqsaryp keledi.
«Egemen Qazaqstan» gazeti osyndaı órkendi ózgeristerdi beıneleıtin materıaldardy turaqty jarııalap turady.
Tómende Aqtóbe oblysynyń Qarǵaly aýdanyndaǵy Stepnoe aýylynan fotoreportaj berilip otyr.
Qarǵaly aýdanyndaǵy Stepnoe aýylynyń ataq-dańqy oblystan tysqary jerlerge de belgili. Tútini túzý kóterilgen eldi mekenniń turmysy baqýatty bolýyna osyndaǵy «Stepnoe» jaýapkershiligi shekteýli seriktestiginiń úlesi zor.
Munda aýyl sharýashylyǵy ónimderi óndiriledi jáne óńdeledi, qurama jem óndirip ótkizedi, qurylys-qurastyrý, ǵımarattarǵa kúrdeli jóndeý jumystary júrgiziledi, avtomashınalardy jóndeıdi jáne tehnıkalyq qamtý jumystaryn atqarady. Eksporttyq-ımporttyq operasııalardy, saýda-sattyq qyzmetin jasaıdy. Eń bastysy, asyl tuqymdy mal ósirip, ótkizedi. Mine, aýyl sharýashylyǵynyń san-salaly jumystaryn qatar júrgizip otyrǵan seriktestik aýyldyqtarǵa jumys taýyp berip, tabys kózin molyqtyryp qana otyrǵan joq, osy aýyldyń barlyq turmys-tirshiliginiń boıyna qan júgirtip otyr. Egemendiktiń eleń-alańynda osyndaǵy mádenı-áleýmettik nysandardyń jekeshelenip ketpeýine bas-kóz bolǵan seriktestik dırektory Amanqos Tóleýovti aýyldyń turǵyndary týǵanyndaı syılap, qurmetteıtini de sondyqtan. Osy jerde eńbek jolyn bastaǵan basshyny aýyldyń eńbektegen jasynan eńkeıgen qartyna deıin tanıdy. Árkim qolǵa ilikkenin ıelene bastaǵan sonaý jappaı jekeshelendirý kezinde bir búldirgini de almaǵan jas basshy ne kórse de aýyldastarymen ortaq bolýdy qalady. Jaı ǵana qalap qoıǵan joq kúrdeli kezeńnen olardy ádemi alyp ótti. Bul aýyl joqshylyqty, qıyndyqty bastan keshpedi dese de bolady. Aýyl úshin kúrdeli kezeńde de barlyq áleýmettik nysandar jumys istep, iship-jemnen kende bolǵan joq. Stepnoelyqtar az qamtylǵan degenge arlanady, ondaılardy bul aýyldan kezdestirmeısiz de. Mine, jyl ótken saıyn aýyldyqtardyń turmysy túzelip, aýyldyń kelbeti kóriktenip keledi. Sonyń bári «myń qosshydan bir basshy» degendeı, bilikti basshy Amanqos Tóleýovtiń arqasy ekenin aýyldyqtar joqqa shyǵarmaıdy. Basqasyn bylaı qoıǵanda, osy sharýashylyqty basqarǵanyna da otyz jyldan asqan eken. Osy jyldarda ol ekonomıka ǵylymdarynyń kandıdattyǵyn qorǵap, «Qurmet belgisi», «Qurmet» ordenderi men «Qazaqstan Respýblıkasynyń 10 jyldyǵy» medaliniń ıegeri, Qazaqstanǵa eńbek sińirgen qaıratker atandy. 2001 jyly «Qazaqstannyń onjyldyǵynyń úzdik kásipkeri», 2003 jyly «Oblystyń úzdik kásipkeri» ataǵyna ıe boldy.
Otyz myń gektardan astam alqapqa egin ósirgen sharýashylyq bıyl ár gektardan ortasha 7 sentnerden ónim aldy. Qut qambaǵa quıylǵan altyn astyqtan seriktestik ujymy 1 jáne 2 sortty un tartady, 6 túrli makaron buıymdaryn óndiredi. Seriktestikte 25 túrli nan-bólke, 6 túrli jarma shyǵarady. 7 túrli quramajem óndiredi.
Sharýashylyqta 4 myńǵa jýyq iri qara, 370 jylqy, 3 myń qoı jáne túıe ósiriledi. Budan basqa, shujyq jasaýǵa paıdalanatyn shoshqa eti úshin 3 myńnan astam talpaq tanaý taǵy bar. Munyń bárin baǵatyn adam, úılestiretin maman kerek. Osy sharýalardyń basy-qasynda júrgender túgeldeı osy Stepnoe aýylynyń adamdary.
Aýyldyqtar bereke-birliktiń arqasynda óndiristegi eńbekti jeńildetýge qol jetkizýde. Munda 432 ár túrli tehnıka bar. Seriktestiktegi ónimdiligi joǵary tórt amerıkalyq «Djon-Dır», germanııalyq on bir «Medıon-310» jáne tórt «Týkano-320» astyq kombaındaryn aýyldyń jastary urshyqsha úıiredi. Kanadanyń úsh «FLEXICOILSTX-425», bir «JohnDeere-1830» ónimdiligi joǵary egis keshenderi de naýqandyq jumystardy sapaly ári tez atqarýǵa múmkindik berýde. Seriktestikte aýyldyń 250 adamy jumys isteıdi, tabysy ózge aýyldarǵa qaraǵanda anaǵurlym joǵary. Sodan da bolar bul aýylda basqa jaqqa kóshý degen atymen joq. Qaıta alys aýdandardan, tipti oblys ortalyǵynan da osynda attaı qalap, qonys aýdarýshylar bar. Sý qubyrmen úıdi-úıge baryp tur. Qalaǵa aptasyna eki ret tikeleı avtobýs qatynaıdy. Stepnoe aýylyndaǵy bereke men molshylyq, tatýlyq pen birlik ózge aýyldarǵa úlgi bolarlyqtaı.
Arnaıy betti daıyndaǵan «Egemen Qazaqstan» gazetiniń Aqtóbe oblysyndaǵy menshikti tilshisi Satybaldy SÁÝIRBAI.
