Mádenıet jáne sport mınıstrligi Sport jáne dene shynyqtyrý isteri komıtetiniń 2018 jylǵy bergen respýblıkalyq sharalarynyń josparyna sáıkes, Qazaqstan chempıonaty aqpan aıynyń 1-4 aralyǵynda ótkizilmek. Respýblıkalyq chempıonattyń ótýine Mádenıet jáne sport mınıstrliginiń Sport jáne dene shynyqtyrý isteri komıteti, Ulttyq sport túrleri qaýymdastyǵy, ShQO dene shynyqtyrý jáne sport basqarmasy men Úrjar aýdanynyń ákimdigi muryndyq bolyp otyr.
«Qazaqstan chempıonatyna 12 oblys pen 2 qaladan kelgen búrkitshiler qatysady. Barlyq óńirden 50-ge jýyq búrkitshi óner kórsetedi dep kútilip otyr», - dep habarlaıdy Sport jáne dene shynyqtyrý isteri komıtetiniń aǵa jattyqtyrýshysy Bazarbek Kúntýǵanuly.
Al búrkitshilerdiń dástúrli «Qansonar-2018» respýblıkalyq týrnıri bıyl aqpan aıynyń sońynda Batys Qazaqstan oblysynyń ortalyǵy Oral qalasynda ótpek. Ol týrnırge de jıyny 50-ge jýyq jýyq búrkitshi shaqyrylǵan. Oralda ótetin kók taǵylarynyń saıysynda 20-ǵa tarta tóreshi qazylyq etetin bolady.
Odan bólek, aqpan aıynda Almaty qalasynda qusbegilerdiń «Qyran-2018» respýblıkalyq týrnıri, Búrkitshilerdiń III Halyqaralyq festıvali (ázirge qaıda ótetini belgilenbegen) ótkizilmek. Sonymen qatar, Qazaqstanda búrkitshilik pen saıatshylyqty damytý jolynda sáýir aıynda «Tóreshilerdiń bapkerler men nusqaýshylardyń biliktiligin arttyrý kýrstaryn» ótkizý josparlanǵan. Oǵan oblystyq federasııalarǵa qarasty sport mektepteriniń jattyqtyrýshylary men Astana jáne Almaty qalalarynan kelgen nusqaýshylar qatysady.
