Endi mine osy jyldyń basynda «Aqtóbe» fýtbol klýbynyń bas dırektory bolyp esimi elge tanymal, Qazaqstan ulttyq quramasy sapynda biraz jyldar ter tókken kánigi fýtbolshy Samat Smaqov taǵaıyndaldy.
Ol ótken maýsymda kóptegen jaǵdaılarda «shań qaýyp» qala bergen komandany alǵa shyǵara ala ma? Aldymen aıtarymyz, S.Smaqov aqtóbelikter úshin «aıaǵy aspannan salbyrap túse qalǵan» beıtanys adam emes, óıtkeni 39 jastaǵy fýtbol menedjeriniń buǵan deıingi jarqyn, jemisti de jeńisti jyldary osynda ótkeni belgili. Osy kezde Aqtóbe fýtbolynda onyń aıshyqty izi men ilkimdi isi qalǵanyna da eshkim talas týǵyza almaıdy. Beıneli túrde aıtqanda sońǵy kezde Aqtóbe fýtbol klýby beıne bir daǵdarysty kúıge tap boldy desek, S.Smaqov pen bas jattyqtyrýshy V.Mýhanov budan shyǵýdyń is-josparyn jasap, ony oıdaǵydaı oryndap shyǵa alsa, joǵaryda qoıylǵan saýalǵa oń jaýap tabylary anyq.
Bul turǵyda jańa qyzmetine kirisken bas dırektor gazet tilshisine klýbtyń qyzmetin jańa sapalyq deńgeıge, tipti elimizdegi kósh bastaýshy fýtbol komandalarynyń qataryna deıin kóterý úshin barlyq múmkindikti jumyldyrýǵa ázir ekenin málimdedi. Budan ári ol komanda quramyn bas jattyqtyrýshy Vladımır Mýhanovpen ózara keńese otyryp, jasaqtaıtynyn jetkizdi. Al jattyǵý úderisterine kelgende klýb basshysy bas jattyqtyrýshynyń tól isine qol suqpaq emes. Bir aıqyn másele Samat Smaqov «Aqtóbe» fýtbol klýbynyń bas dırektory retinde onyń quramyna jergilikti sportshylar men óz túlekterin qabyldaýǵa basymdyq bermek. Bul úshin ol Aqtóbe qalasy men oblys aýdandarynan sporttaǵy daryndy jastardy izdestirýdi oılastyryp otyr.
Temir QUSAIYN,
«Egemen Qazaqstan»
