«Indýstrııalandyrý jańa tehnologııalardy engizýdiń kóshbasshysyna aınalýy tıis. Onyń nátıjeleri munaı baǵasy kúrt tómendegen 2014-2015 jyldardaǵy daǵdarysta negizgi turaqtandyrýshy faktorlardyń biri boldy. Sol sebepti joǵary eńbek ónimdiligi bar qaıta óńdeý sektoryna degen baǵdarymyz ózgergen joq», delingen Joldaýda.
Sonymen qatar ındýstrııalandyrý 4.0 jańa tehnologııalyq qalyptyń barlyq múmkindikterin paıdalana otyryp, meılinshe ınnovasııalyq sıpatqa ıe bolýǵa tıis.
«Kásiporyndarymyzdy jańǵyrtýǵa jáne sıfrlandyrýǵa baǵyttalǵan, ónimniń eksportqa shyǵýyn kózdeıtin jańa quraldardy ázirlep, synnan ótkizý qajet. Bular, birinshi kezekte, tehnologııalardyń transfertin yntalandyrýǵa tıis. Elimizdiń birneshe ónerkásiptik kásipornyn sıfrlandyrý jónindegi pılottyq jobany iske asyryp, bul tájirıbeni keńinen taratý kerek. Sıfrlyq jáne basqa da ınnovasııalyq sheshimderdi ázirleýshilerdiń óz ekojúıesin damytýy asa mańyzdy máselege aınalyp keledi. Ol bizdiń Nazarbaev Ýnıversıteti, «Astana» halyqaralyq qarjy ortalyǵy, IT-startaptardyń halyqaralyq tehnoparki sııaqty ınnovasııalyq ortalyqtardyń tóńireginde qalyptasýǵa tıis», dedi Elbasy.
Memleket basshysy «Alataý» ınnovasııalyq tehnologııalar parkiniń qyzmetin uıymdastyrýdy túbegeıli qaıta qaraý qajet ekenin atap ótti.
«Naqty sektordyń jańa tehnologııalarǵa degen suranysty yntalandyrýy jáne venchýrlyq qarjylandyrýdyń jeke naryǵynyń qyzmeti ınnovasııalyq ekojúıe jetistikteriniń negizgi faktorlary bolyp sanalady. Bul úshin tıisti zańnama qajet», dedi Nursultan Nazarbaev.
Budan bólek, IT jáne ınjınırıngtik qyzmet kórsetýdi damytý erekshe mańyzǵa ıe bolyp otyr.
«Ekonomıkany sıfrlandyrý tabys ákelgenimen, jumys kúshiniń kóptep bosap qalý qaýpin de týdyrady. Bosaıtyn jumys kúshin eńbekpen qamtý úshin kelisilgen saıasatty aldyn ala tııanaqtaý kerek. Bilim berý júıesin, kommýnıkasııa men standarttaý salalaryn jańa ındýstrııalandyrý talaptaryna beıimdeý qajet bolady. 2018 jyly «sıfrlyq dáýir» ónerkásibin qalyptastyrýǵa arnalǵan ındýstrııalandyrýdyń úshinshi besjyldyǵyn ázirleýge kirisý kerek», delingen Joldaýdyń birinshi mindetinde.
