«Memleket jastarǵa alǵashqy mamandyqty beredi. Úkimet bul mindetti oryndaýǵa tıis. Orta mektep pen kolledjder jáne joǵary oqý oryndary úzdik oqytýshylarynyń vıdeosabaqtary men vıdeoleksııalaryn Internette ornalastyrý kerek. Bul barlyq qazaqstandyqtarǵa, onyń ishinde shalǵaıdaǵy eldi meken turǵyndaryna ozyq bilim men quzyrettilikke qol jetkizýge jol ashady», dedi Elbasy.
Ol joǵary bilim berý isinde jasandy ıntellektpen jáne «úlken derektermen» jumys isteý úshin aqparattyq tehnologııalar boıynsha bilim alǵan túlekter sanyn kóbeıtý kerek ekenin aıtty.
«Osyǵan oraı metallýrgııa, munaı-gaz hımııasy, agroónerkásip kesheni, bıo jáne IT-tehnologııalar salalaryn zertteý isinde basymdyq beretin joǵary oqý orny ǵylymyn damytý kerek. Qoldanbaly ǵylymı-zertteýlerdi aǵylshyn tiline birtindep kóshirýdi júzege asyrý talap etiledi. Joǵary oqý oryndary shetelderdiń jetekshi ýnıversıtetterimen, ǵylymı ortalyqtarymen, iri kásiporyndarymen jáne transulttyq korporasııalarymen birlesken jobalardy belsendi túrde júzege asyrýy qajet», dedi Nursultan Nazarbaev.
Memleket basshysy jeke sektordyń birlesken qarjylandyrýǵa atsalysýy barlyq qoldanbaly ǵylymı-zertteý ázirlemeleri úshin mindetti talap bolýǵa tıis ekenin aıtty.
«Jas ǵalymdarymyzǵa ǵylymı granttar aıasynda kvota bólip, olardy qoldaýdyń júıeli saıasatyn júrgizýimiz kerek. Bilim berý salasyna óziniń ınvestısııalyq jobalary men eksporttyq áleýeti bar ekonomıkanyń jeke salasy retinde qaraıtyn kez keldi. Joǵary oqý oryndaryna bilim berý baǵdarlamalaryn jasaýǵa kóbirek quqyq berip, olardyń akademııalyq erkindigin zańnamalyq turǵydan bekitý kerek», dedi Memleket basshysy.
Ol oqytýshylardyń qaıta daıarlyqtan ótýine kúsh salyp, joǵary oqý oryndaryna sheteldik menedjerlerdi tartyp, álemdik ýnıversıtetterdiń kampýstaryn ashý qajet ekenin atap ótti.
«Ulttyń áleýetin arttyrý úshin mádenıetimiz ben ıdeologııamyzdy odan ári damytýymyz kerek. «Rýhanı jańǵyrýdyń» mán-mańyzy da naq osynda. О́ziniń tarıhyn, tilin, mádenıetin biletin, sondaı-aq zamanyna laıyq, shet tilderin meńgergen, ozyq ári jahandyq kózqarasy bar qazaqstandyq bizdiń qoǵamymyzdyń ıdealyna aınalýǵa tıis», delingen Memleket basshysynyń Qazaqstan halqyna Joldaýynda.
