«Eńbek naryǵynyń tıimdiligin qamtamasyz etip, árbir adamnyń óz áleýetin iske asyra alýy úshin jaǵdaı jasaýdyń mańyzy zor. Barlyq negizgi mamandyq boıynsha zamanaýı standarttar ázirleý qajet. Bul standarttarda jumys berýshiler men bıznesmender eńbekkerlerdiń bilimi, qabileti men quzyretiniń qandaı bolýy qajettigin naqty belgileıdi. Kásibı standarttardyń talaptaryn eskerip, bilim berýdiń jańa baǵdarlamalaryn ázirleý qajet nemese qazirgi baǵdarlamalardy jańartý kerek», dedi Elbasy.
Memleket basshysy ózin-ózi jumyspen qamtyǵandar men jumyssyzdar ekonomıkalyq ósimniń rezervi sanalatynyn aıtty.
«Men ózin-ózi jumyspen qamtyǵandar máselesin qarastyrý jóninde birneshe ret talap qoıǵanmyn. Eńbek jáne halyqty áleýmettik qorǵaý mınıstrligi bul iske jaýapsyzdyq tanytyp, atústi qarap otyrdy. Adamdardy nátıjeli jumysqa tartý úshin kóbirek múmkindik berip, olardyń jeke kásibin bastaýyna nemese jańa mamandyq alyp, jumysqa ornalasýyna jaǵdaı jasaý kerek», dedi Nursultan Nazarbaev.
Memleket basshysy «Atameken» ulttyq kásipkerler palatasynyń bıznesti úıretý jónindegi jumystary qoldaýǵa turarlyq, nátıjeli jumyspen qamtýdy jáne jappaı kásipkerlikti damytý baǵdarlamasy aıasynda onyń quraldaryn nyǵaıta otyryp, halyqtyń osy sanattaryn keńinen tartý qajettigin atap ótti.
«О́zin-ózi jumyspen qamtyǵandardy tirkeý úderisin meılinshe jeńildetip, olarǵa memleket aldyndaǵy mindetterin adal atqarý tıimdi bolatyndaı jaǵdaı týǵyzý qajet. Qazaqstandyqtardyń jańa jumys ornyn salystyrmaly túrde tezirek ıelenýge, sonyń ishinde elimizdiń basqa da eldi mekenderinen jumys tabýǵa múmkindigi bolýǵa tıis», dedi Nursultan Nazarbaev.
Ol biryńǵaı elektrondyq eńbek bırjasyn keń aýqymda engizý qajet ekenin, onda bos jumys oryndary men jumys izdeýshiler týraly barlyq aqparat jınaqtalýǵa tıistigin atap ótti.
«Azamattar úılerinen shyqpaı-aq kásibı baǵdarly test tapsyryp, oqý kýrstary men memlekettik qoldaý sharalary týraly bilip, ózin qyzyqtyratyn jumys taba alatyn bolady. Eńbek kitapshalaryn da elektrondyq formatqa kóshirgen jón. Elektrondyq eńbek bırjasy týraly zańdy 2018 jylǵy 1 sáýirge deıin qabyldaý qajet», dedi Memleket basshysy.
Nursultan Nazarbaev áleýmettik saıasat azamattardy tolyqqandy ekonomıkalyq ómirge tartý arqyly júzege asyrylatyn aıtty.
«Qazir zeınetaqy júıesi tolyqtaı eńbek ótiline baılanystyrylǵan. Kim kóp jumys istese, sol kóp zeınetaqy alatyn bolady. Osyǵan oraı, barsha qazaqstandyqtar ózderiniń atqaratyn jumystaryn zańdastyrýǵa zor mán berýi kerek. Áleýmettik saqtandyrý júıesinde de eńbek ótili men ótemaqy mólsheri arasyndaǵy ózara baılanys kúsheıtiletin bolady», dedi Nursultan Nazarbaev.
Ol 2018 jyldan bastap halyqtyń áleýmettik turǵydan az qamtylǵan tobyna ataýly áleýmettik kómek kórsetýdiń jańa tártibine kóshkenimizdi eske saldy.
«Onyń shegi eń tómengi kúnkóris deńgeıiniń 40 prosentinen 50 prosentine deıin kóterildi. Eńbekke qabiletti áleýmettik turǵydan az qamtylǵan azamattar úshin beriletin qarjylaı kómek olar jumyspen qamtý sharalaryna qatysqan jaǵdaıda ǵana qoljetimdi bolady. Eńbekke qabiletsiz azamattarǵa memlekettik qoldaý kórsetý sharalary kúsheıtiledi», delingen Memleket basshysynyń Joldaýynda.
