«Memlekettik ákimshilendirý kezinde kásipkerler men turǵyndardyń shyǵyndaryn qysqartýǵa baılanysty jumystardy jalǵastyrý qajet. Osyǵan oraı bıznesti retteýge qatysýdy ári qaraı azaıtýǵa baǵyttalǵan zań qabyldaýdy jyldamdatý kerek. «Bir tereze» qaǵıdaty boıynsha bızneske memlekettik qoldaý kórsetý úderisterin sıfrlandyrýdy qamtamasyz etý qajet. Memlekettik organdardyń aqparattyq júıeleriniń ıntegrasııasy «bir ótinish» qaǵıdaty boıynsha jekelegen memlekettik qyzmet kórsetýden keshendi qyzmet kórsetýge kóshýge múmkindik beredi», dedi Elbasy.
Sonymen qatar Memleket basshysy tabıǵı monopolııa sýbektileri kórsetetin qyzmetteriniń sapasyn arttyrý jónindegi jumysty jalǵastyrý kerektigin atap ótti.
«Olar úshin jáne energııa óndirýshiler úshin ınvestısııalyq baǵdarlamalaryn eskerip, negizdelgen tarıfterdi belgileý mańyzdy. Bıznes-klımatty jaqsartý úshin batyl is-qımyl talap etiledi, ásirese óńirlik deńgeıde. Úkimet bıznesti kóleńkeden shyǵaryp, ony qoldaýǵa baǵyttalǵan júıeli sharalardyń jańa paketin daıyndaýǵa tıis», delingen Joldaýda.
Ol memlekettik organdarǵa baǵynyshty uıymdardyń sanyn qysqartý esebinen jekeshelendirý josparyn keńeıte otyryp, ony iske asyrýdy jedeldetý qajet ekenin aıtty.
«Ákimshilik shyǵyndardy azaıtý úshin vedomstvoǵa baǵynyshty naqty qajetti uıymdardy múmkindiginshe biriktirý kerek. Bosaǵan qarajatty memlekettik qyzmetshilerdiń faktorlyq-baldyq shkalaǵa negizdelgen jańa eńbekaqy júıesin engizýge baǵyttaý qajet. Bul ortalyqtaǵy jáne óńirlerdegi memlekettik qyzmetshiler jalaqysynyń dısproporsııasyn qysqartady, sondaı-aq jumystyń sıpaty men tıimdiligi eskeriletin bolady», dedi Elbasy.
Nursultan Nazarbaev Úkimetke Memlekettik qyzmet isteri agenttigimen birlesip, 2018 jyly ortalyq jáne jergilikti memlekettik organdarda osy júıeni engizýdiń pılottyq jobalaryn iske asyrýdy tapsyrdy.
«О́ńirlerdegi memlekettik qyzmettiń tıimdilik áleýetin olardyń ekonomıkalyq derbestigi men jaýapkershiligin arttyrý arqyly meılinshe tolyq ashý kerek. Jalpy alǵanda, óńirlik saıasat óńirlerdiń shyǵyndaryn teńestirýden jeke tabystarynyń ósimin yntalandyrýǵa baǵyttalýǵa tıis. Atap aıtqanda, búginde álemdegi árbir onynshy jumys ornyn ashyp otyrǵan syrttan kelýshiler týrızmi men ishki týrızm kez kelgen óńir úshin perspektıvalyq tabys kózderiniń biri bolyp sanalady», dedi Memleket basshysy.
Sonymen qatar Úkimet vıza máselelerin jeńildetýdi, ınfraqurylymdy damytýdy jáne týrızm salasyndaǵy kedergilerdi alyp tastaýdy qamtıtyn keshendi sharalar qabyldaýy kerektigin atap ótti.
«Fıskaldy ortalyqsyzdandyrý aıasynda shaǵyn jáne orta bıznesten túsetin korporatıvti tabys salyǵyn óńirlik bıýdjetterge berý máselesin sheshý kerek. 2018 jyldyń 1 qańtarynan bastap 2 myńnan astam adam turatyn aýdandyq mańyzy bar qalalar, aýyldar men aýyldyq okrýgterde jergilikti ózin-ózi basqarýdyń derbes bıýdjeti men kommýnaldyq menshigin engizý zań júzinde belgilengen. 2020 jyldan bastap bul normalar barlyq eldi mekenderde kúshine enedi. Salyqtyq jáne salyqtan tys basqa da túsimderdiń 7 túri, sondaı-aq shyǵyndardyń 19 baǵyty aýyl bıýdjetine berildi. Bul jergilikti mańyzy bar máselelerdi sheshý úshin halyqty tartýǵa múmkindik beredi», dedi Memleket basshysy.
Sonymen qatar memlekettik organdar naqty ýaqyt jáne jedel jaýap berý rejiminde azamattardyń eskertpeleri men usynystaryn esepke alý úshin zamanaýı sıfrlyq tehnologııalardy qoldanýǵa tıis ekenin atap ótti. «Memleket pen kompanııalar jańa tehnologııalardy engize otyryp, óz aqparattyq júıeleri men qurylǵylarynyń berik qorǵalýyn qamtamasyz etýi kerek», dedi Elbasy.
Búginde kıberqaýipsizdik uǵymy tek aqparatty ǵana emes, sonymen qatar óndiristik jáne ınfraqurylymdyq nysandardy basqarý tetigin qorǵaý degendi de bildiredi. «Osy jáne ózge de sharalar Qazaqstannyń Ulttyq qaýipsizdik strategııasynda kórinis tabýǵa tıis», delingen Joldaýda.
