«N.Nazarbaev: dáýir, tulǵa, qoǵam» kórmesi «Kóshbasshy joly», «Kóshbasshy fenomeni», «Elbasy mártebesi – el mártebesi» jáne «Álem tanyǵan kóshbasshy» taqyryptyq arnaıy bólimderden turady. El nazaryna Qazaqstan Respýblıkasynyń Tuńǵysh Prezıdenti – Elbasy kitaphanasy qorynyń arhıvtik qujattary, kitaptar men jádigerleriniń toptamasy usynylyp otyr. Kórmeniń árbir ekspozısııasyna qoıylǵan Táýelsiz Qazaqstannyń tarıhı derektik hronıkasy Elbasynyń qyzmeti arqyly ınteraktıvti aýqymdy aqparattyq resýrstar arqyly kórsetiledi.
El yqylasyn oıatqan bul kórmeniń maqsaty Qazaqstan Respýblıkasynyń Tuńǵysh Prezıdenti – Elbasynyń álemge tanylǵan, ekonomıkasy qarqyndy damyǵan, iri ekonomıkalyq, óndiristik, ǵylymı, mádenı, zamanaýı memleket qalyptastyrýdaǵy rólin júıeli túrde kórsetý bolyp tabylady. Kitaphana jınaǵynyń materıaldary N.Nazarbaevtyń mektep jasyndaǵy, jastyq shaq, komsomol, partııa jáne memlekettik qyzmettegi kezeńderin sıpattaıdy. Qazaqstan Respýblıkasynyń Tuńǵysh Prezıdenti – Elbasy kitaphanasynyń qoryndaǵy kitaptardyń arasynan ár jyldarda N.Á.Nazarbaevqa syıǵa berilgen qazaqstandyq avtorlardyń qoltańbasy qoıylǵan kitaptar erekshe oryn alady. Memleket basshysynyń tulǵasyna baılanysty, árbir qoltańbasy bar kitapta syılaýshynyń taǵdyry men kitaptyń qaıtalanbas tarıhy jatyr.
«Álem tanyǵan kóshbasshy» bóliminde sheteldik memleket jáne Úkimet basshylarynan tapsyrylǵan dıplomatııalyq syılyqtar usynylǵan. Bul syılyqtar N.Á.Nazarbaevtyń syrtqy saıasattaǵy saıası bastamalarynyń nátıjesi bolyp tabylady. Qazaqstannyń qazirgi zamanǵy tarıhynyń ózekti máseleleri Memleket basshysynyń kóptegen ǵylymı jáne ǵylymı-tanymdyq eńbekterinde qarastyrylady. N.Á.Nazarbaev dúnıe júziniń 34 tiline aýdarylǵan jıyrmadan artyq kitaptardyń jáne ǵylymı maqalalardyń avtory.
Elbasy N.Á.Nazarbaevqa sheteldiń 30-dan asa memleketinen berilgen eń joǵary marapattary kitaphananyń mýzeı qorynyń eń basty qundylyqtary ári maqtanyshy bolyp esepteledi. Bul marapattar memleketter arasyndaǵy dıplomatııalyq qatynastar ornatýdaǵy N.Á.Nazarbaevtyń qosqan zor úlesi úshin, ıadrolyq qaýipti joıý jáne Qazaqstandaǵy ultaralyq, dinaralyq tatýlyq pen kelisimdi qamtamasyz etýdegi tolaıym bastamalary úshin berilgeni belgili.
Is-sharaǵa elimizdiń tanymal tarıhshy ǵalymdary Sh.Ýálıhanov atyndaǵy Tarıh jáne etnologııa ınstıtýtynyń dırektory, professor Zııabek Qabyldınov pen professor Murat Ábdirov qatysyp, kórmege kelgen jastarǵa qyzǵylyqty áńgime ótkizdi.
Saparbaı PARMANQUL,
«Egemen Qazaqstan»
ALMATY
