Qalada bıylǵy kólik reformasy aıasynda syıymdylyǵy ártúrli 388 avtobýs alynǵan. Olardyń 195-i baǵyttar boıynsha qyzmet kórsetýde. Oǵan qosa qalaǵa ákelingen sý jańa 200 avtobýs kezeńder boıynsha jolǵa shyǵady. О́z kezeginde jeke tasymaldaýshylar da 254 jańa avtobýs alǵan, qazirgi ýaqytta olardyń 91-i qala joldarynda.
Sońǵy málimetterge súıensek, qalanyń avtobýs parkiniń 30 paıyzǵa jańarýy jáne baǵyt jelisiniń ulǵaıýy jolaýshylar legin 20,6 paıyzǵa arttyrǵan. Eger 2016 jyly 174,6 mln adam tasymaldansa, 2017 jyly bul kórsetkish 220,1 mln jolaýshyǵa artqan. «Tasymaldaýshy josparly shyǵýdy qamtamasyz ete almasa, ınterval men jyljymaly quramdy jańartý «Almatyelektrotransqa» beriledi. Mysaly, №70 baǵytta avtobýstar jańardy, ınterval qysqardy, sonyń arqasynda jolaýshylar legi 12 ese ósti, ıaǵnı táýligine 395 adamnan 4,6 myń adamǵa deıin jetti. Jaqynda 18 metrli avtobýs-garmoshkalar №201 baǵyty boıynsha júre bastady, ol kúnine 11,6 myń adamdy tasymaldaýda, boljamdaǵy jolaýshylar legi – 25 myń adam», deıdi jaýapty mamandar.
№12 baǵyty boıynsha jolǵa shyqqan 12 metrli tómen edendi avtobýstar Eýro-5 ekologııalyq synypqa saı, syıymdylyǵy 100 adamnan joǵary, kondısıonerlermen, beınebaqylaý kameralarymen, pandýstarmen jáne basqa da qajetti quraldarmen tolyq jabdyqtalǵan. Atalǵan baǵytty «Almatyelektrotrans» JShS uıymdastyrǵan. Máselen, jaı kúnderi avtobýstar arasyndaǵy ınterval alty mınýtqa qysqarsa, demalys kúnderi eki mınýtqa azaıǵan. Bosaǵan avtobýstardy «Green Bus company» JShS №120 baǵytty kúsheıtý úshin paıdalanady, keıin bul baǵyt aınalmaly bolady dep kútilýde.
Eske salsaq, buǵan deıin Almatyda kólikti reformalaý aıasynda №22, 70, 86, 65, 103, 50, 126, 112 baǵyttary boıynsha jańa avtobýstar jolǵa shyǵyp, №77 baǵyt qaıta ashylyp, kólikter №201 magıstraldy baǵyty boıynsha júre bastaǵan edi. Kórshi oblystan qalaǵa qosylǵan eldi mekenderge tolyq kólik qyzmetin kórsetý maqsatynda segiz baǵyt ashylǵan bolatyn. Shahar turǵyndary men qonaqtaryn Medeýmen qaýyshtyratyn sý jańa alyp avtobýstar ıir-qıyr joldar men kilt burylystardan irkilmeı ótip, demalýshylardy dittegen jerine aman-saý jetkizbek.
Arman OKTIаBR,
«Egemen Qazaqstan»
ALMATY
