Rásim barysynda Elbasyna Shvesııanyń Tótenshe jáne ókiletti elshisi Mats Foıer, Ulybrıtanııa elshisi Maıkl Djon Gıfford, Kýba elshisi Emılıo Pevıda Pýpo, Úndistan elshisi Prabhat Kýmar Senim gramotasyn tapsyrdy.
Rásimge qatysýshylarǵa arnalǵan sózinde olardyń dıplomatııalyq mıssııalary Qazaqstannyń jańa damý kezeńine tuspa-tus kelip otyrǵanyn atap kórsetti. «Búgin Qazaqstandaǵy dıplomatııalyq mıssııalaryńyz resmı túrde bastalady. Jaýapty ári mártebeli mıssııalaryńyz elder arasyndaǵy yntymaqtastyqty jan-jaqty damytýǵa serpin beredi dep senemin», dedi Elbasy.
Budan keıin kúni keshe jarııalanǵan Joldaýdyń mańyzdylyǵyn tarqatyp aıtyp berdi. «Sizderdiń jumystaryńyz qyzyqty jáne jaýapty kezeńge tuspa-tus kelip otyr. Tehnologııalyq revolıýsııa jańa syn-qater ákelýmen qatar, kez kelgen eldiń damýynda serpilis jasaýǵa múmkindik beredi.
Sondyqtan Qazaqstan halqyna «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Joldaýymdy jarııaladym. Ekonomıkany, áleýmettik salany, memlekettik basqarý isin damytýdyń negizgi baǵyttary boıynsha naqty 10 mindet qoıdym. Bulardy sheshý zamanaýı tehnologııalardy paıdalanýdy kózdeıdi. Jańa sıfrly dáýirge tabysty beıimdelý, ozyq damyǵan 30 eldiń qataryna qosylý máselesine kómektesedi. Sol úshin «Sıfrly Qazaqstan» memlekettik baǵdarlamasy qabyldanyp, iske asyrylyp jatyr. Ol ekonomıka men tirshiliktiń barlyq salasyn qamtıdy», dedi N.Nazarbaev.
Memleket basshysy Qazaqstannyń halyqaralyq arenada belsendi pozısııa ustanýy dástúrge aınalǵanyn atap kórsetti. Mundaı ustanym eń ózekti jahandyq jáne óńirlik problemalardy sheshýge múmkindik beredi. Turaqtylyq pen qaýipsizdikti nyǵaıtý máselelerin, órkenıetter dıalogyn ilgeriletýge erekshe úles qosýǵa jaǵdaı jasaıdy. Kelesi kezekte Qazaqstanda ótken birqatar halyqaralyq is-sharalardyń nátıjelerine toqtaldy.
«Astanada TMD keńistiginde tuńǵysh ret uıymdastyrylǵan «Bolashaqtyń energııasy» taqyrybyndaǵy EKSPO-2017 halyqaralyq kórmesi ótti. Elimiz ıadrolyq qarýdy taratpaý rejimine baılanysty ǵalamdyq jumystyń aldyńǵy qatarynda júr. 2017 jylǵy 29 tamyzda Halyqaralyq ıadrolyq synaqtarǵa qarsy kúres kúnine oraı MAGATE-niń tómen baıytylǵan ýran banki ashyldy. Sırııaaralyq qaqtyǵystardy retteýdiń jańa tetigi retindegi Astana prosesi aıasyndaǵy oń nátıjeler bizdiń eldiń derbes jáne beıtarap alań retinde tańdalýynyń durystyǵyn kórsetti jáne ony álemdik qoǵamdastyq moıyndady», dedi N.Nazarbaev.
Memleket basshysy Qazaqstannyń BUU Qaýipsizdik Keńesiniń tóraǵasy retinde qarastyratyn máselelerine jan-jaqty toqtalyp, jahandyq organnyń barlyq músheleriniń ózara ymyra men konsensýske kelýi úshin belsendi túrde kúsh jumyldyrýdyń mańyzdy ekenin aıtty.
«Qazaqstan bıylǵy qańtar aıynda BUU Qaýipsizdik Keńesiniń tóraǵasy rólindegi tarıhı qyzmetine kiristi. Osy mańyzdy organnyń kún tártibindegi barlyq máselege saı jumys júrgizip jatqanymyz bárińizge málim. Bıyl 18 qańtarda Qaýipsizdik Keńesiniń «Jappaı qyryp-joıatyn qarýdy taratpaý: senim sharalary» atty brıfıngine qatysýdy josparlap otyrmyn. Bul taqyryp kezdeısoq tańdalǵan joq. Biz taratpaý rejimin dáıekti túrde nyǵaıtý men keńeıtý arqyly ǵalamdy ıadrolyq qarýdan azat etý, jahandyq soǵys qaýpiniń aldyn alyp, ony tolyq joıý úshin álemdik qoǵamdastyqtyń kúsh-jigerin jumyldyra berýge nıettimiz», dep málimdedi N.Nazarbaev.
Elimizdiń sheteldik áriptestermen saýda-ekonomıkalyq qarym-qatynastardy nyǵaıtýǵa múddeli ekenin aıtyp, ınvestısııalyq ahýaldy jaqsartý úshin qabyldanyp jatqan sharalarǵa toqtaldy.
«Ekonomıkalyq baǵyt – sheteldik áriptestermen yntymaqtastyqtyń basty arqaýy. Bul úshin iskerlik ahýaldy jaqsartý jumystary jalǵasyp keledi. Búginde Qazaqstan bıznes júrgizý jeńildigi kórsetkishi boıynsha 190 eldiń ishinde 36-orynda tur. Eńbek naryǵynyń tıimdiligi kórsetkishi boıynsha 35-oryndamyz. 2017 jyly vızasyz rejim qoldanylatyn elder sanyn 62-ge jetkizdik. Investorlarǵa jeńildikter qarastyrylǵan «bir tereze» qaǵıdaty boıynsha jumys istep kelemiz. Kásipkerlik salasynda zańnama jetildirilip, jańa Salyq kodeksi qabyldandy. Elimizde 10 arnaıy ekonomıkalyq aımaq pen 20-ǵa jýyq ındýstrııalyq aımaq jumys isteıdi. Eýrazııalyq ekonomıkalyq odaq pen Qytaı naryǵyna shyǵatyn ınfraqurylym qalyptasty. Jeti jyl buryn elimiz aýqymdy ındýstrııalandyrýǵa baǵyt alǵany belgili. Osy ýaqyt ishinde 1100 jańa óndiris iske qosylyp, 100 myń qazaqstandyqqa jumys orny ashyldy», dedi N.Nazarbaev.
Ulybrıtanııa jáne Soltústik Irlandııa Qurama Koroldiginiń Tótenshe jáne ókiletti elshisine arnaǵan sózinde ekonomıkalyq baǵyt elimizdiń sheteldik áriptestermen yntymaqtastyǵynyń basty ózegi bolyp sanalatynyn atap ótti.
«Ulybrıtanııa – álemdegi mańyzdy áriptesimizdiń biri. Eki el arasyndaǵy yntymaqtastyq ózara qurmet pen senimge berik negizdelgen. Búginde Ulybrıtanııa Qazaqstannyń iri ınvestorlarynyń jáne saýda áriptesiniń biri bolyp sanalady. Meniń 2015 jylǵy Londonǵa saparym osy jemisti yqpaldastyq pen eki eldiń qarym-qatynasyna tyń serpin berdi. Bizdiń saıası dıalogymyz ekijaqty formatta tabysty damyp keledi», dedi Prezıdent.
N.Nazarbaev Shvesııa týraly da jyly pikir bildirdi. О́tken jyly Shvesııa parlamenti spıkeri Ýrban Alınnyń Qazaqstanǵa sapary mańyzdy oqıǵaǵa aınalǵanyn atap ótti. Qazaqstan men Shvesııa arasyndaǵy saýda-ekonomıkalyq yntymaqtastyqty jandandyryp, ekijaqty saýda-sattyqtyń kólemin arttyrýdyń mańyzdylyǵyna toqtaldy.
Elbasy P.Kýmardy Úndistannyń Shanhaı yntymaqtastyq uıymynyń tolyq múshesi bolýymen quttyqtap, eldi Qazaqstannyń mańyzdy syrtqy saıası jáne saýda seriktesi retinde qarastyratynyn atap ótti.
«Úndistan men Qazaqstan halyqaralyq uıymdar aıasynda ózara belsendi is-qımyl jasap keledi. Elderińiz Shanhaı yntymaqtastyq uıymynyń jumysyna tyń serpin berip, mártebesin arttyrady dep senemiz. Uıym sammıti aıasynda Úndistan Premer-mınıstri Marenda Monımen kezdesip, ekijaqty qarym-qatynastyń qazirgi máseleleri jan-jaqty talqylandy. Sondaı-aq eki eldiń vedomstvolaryna saýda-ekonomıkalyq yntymaqtastyqtyń qarymyn kúsheıtý jóninde naqty tapsyrma berildi», dedi.
Budan keıin Qazaqstan men Kýba qarym-qatynastary aıtarlyqtaı jandanǵanyn atap ótip, elderimizdiń saýda-ekonomıkalyq jáne saıası yntymaqtastyǵyn nyǵaıtý úshin naqty jumystardy jalǵastyrý qajet ekenin aıtty.
«Men 2017 jylǵy sáýirde alǵash ret Kýbaǵa resmı saparmen bardym. Kýba basshylyǵymen ótken kelissózder barysynda eki el arasyndaǵy yntymaqtastyqtyń jańa perspektıvalaryn anyqtadyq. Saýda, ekonomıkalyq jáne saıası yntymaqtastyqty nyǵaıtý úshin naqty jumystardy jalǵastyrý qajet», dedi N. Nazarbaev.
Jıyn sońynda sheteldik dıplomattardyń Astanadaǵy qyzmetteriniń qyzyqty ári jemisti bolýyna nıettestik bildirip, elshilerdiń jumysyna tabys tiledi.
Sodan keıin shetel elshileri jýrnalıstermen kezdesip, óz pikirlerimen bólisti. Olar Qazaqstanda jańa qyzmetke taǵaıyndalýlaryn zor mártebe sanaıtynyn jetkizip, ózara qarym-qatynasty nyǵaıtýǵa atsalysatyndaryn málimdedi. Sondaı-aq elimizdi BUU Qaýipsizdik Keńesine tóraǵa bolýymen quttyqtady.
Abaı ASANKELDIULY,
«Egemen Qazaqstan»
