«Elbasy N.Nazarbaev Qazaqstan halqyna Joldaýynda memleket úshin áleýmettik saıasattyń basymdyqtary onyń ishinde negizgi baǵyttarynyń biri adamı kapıtaldy damytý ekendigin taǵy da qadap aıtty. Memleket basshysynyń tapsyrmasyna oraı bıyl respýblıkalyq bıýdjettiń áleýmettik salaǵa bólinetin shyǵyny 12 paıyzǵa artyp, 4 trln teńgeden asatyn bolady. Elbasynyń bıylǵy Joldaýyn eskere otyryp, Eńbek jáne halyqty áleýmettik qorǵaý mınıstrligi áleýmettik qamsyzdandyrý jáne eńbek salasyn damytý boıynsha aldyǵa naqty mindetter qoıyp otyr», dedi vıse-mınıstr.
Bıylǵy Joldaýda Memleket basshysy Nursultan Nazarbaev Eńbek jáne xalyqty áleýmettik qorǵaý mınıstrliginiń jumysyn synǵa alǵany belgili.
«Prezıdent óz Joldaýynda mınıstrliktiń jumysyn qatty synǵa aldy. Biz ol syndy tolyǵymen moıyndaımyz. Ol sózderdiń negizi bar», dedi Eńbek jáne xalyqty áleýmettik qorǵaý vıse-mınıstri S. Jaqypova.
Mınıstrliktiń málimetine sáıkes, respýblıka boıynsha 940 myń adam ózin-ózi jumyspen qamtyp, paıda taýyp júr. Olardyń barlyǵy bıýdjetke eshqandaı tólemder jasamaıdy. Zeınetaqy qoryna da aqsha aýdarmaıdy. «Demek, ol adamdar bolashaqta zeınetaqyǵa qalaı shyǵatyndaryna mán bermeıdi. Áleýmettik saqtandyrý qoryna da aqsha tólemeıdi. Ondaı adamdar erteń eńbekke jaramsyz bolyp qalamyn, bala kóteremin degen máselelerdi oılanýy kerek», dedi S.Jaqypova.
Onyń aıtýynsha, qazirgi kezde osy sanattaǵy azamattardy anyqtaý jáne tirkeý jumystarymen memlekettik kirister departamentteri aınalysyp jatyr.
«Budan bólek, 178 myń adam ózderin jeke kásipker dep tanystyrǵan. Alaıda olardyń barlyǵy tıisti memlekettik organdarda tirkelmegen bolyp shyqty. Sonda olar kásipkerlikpen aınalyssa da, ózin-ózi jumyspen qamtyp júrgender sııaqty bıýdjetke eshqandaı salyq tólemeıdi, zeınetaqy men áleýmettik qorǵa aqsha aýdarmaıdy. Demek, Qazaqstanda barlyǵy 1 mln-nan astam adam óz kásibin zańdastyrýy qajet», dedi ol.
Elbasy Joldaýda «Biryńǵaı elektrondy eńbek bırjasyn keń aýqymda engizý qajet. Onda bos jumys oryndary men jumys izdeýshiler týraly barlyq aqparat jınaqtalýǵa tıis» ekenin aıtqan bolatyn. Vıse-mınıstr júktelgen mindetti júıeli atqarý úshin tıisti jumystar atqarylatynyn jetkizdi.
«Elbasy elektrondy eńbek bırjasy týraly zańdy 2018 jylǵy 1 sáýirge deıin qabyldaý qajettigin tapsyrdy. Biz qazirdiń ózinde osy tapsyrma tóńireginde jumys istep jatyrmyz», dedi S.Jaqypova.
Raýan QAIDAR,
«Egemen Qazaqstan»
