Qysqasy, Qazaqstan sportynyń shejiresinde aty shegendelgen chempıonǵa qatysty myna bir sóıleıtin sýret bizdi jyl basynda «Bir sýrettiń syry» aıdaryna jetelep otyr.
Sporttaǵy mansabyn 13 jasynda Semeıde ótken el chempıonatynan bastaǵan Ilıa 2005 jyly 17 jasynda jasóspirimder arasyndaǵy álem chempıony atanǵanyn aıta ketsek nesi aıyp?! Dál osy jyly 15 qarashada Qatardyń Doha qalasynda 2005 jylǵy chempıonattyń tańdaýly ziltemirshisi atandy. 2006 jyly Qytaıda jastar arasyndaǵy álem chempıondyǵyn julyp aldy. Osy jyly Santo-Domıngoda 94 keli salmaq sanatynda álem chempıony boldy. 2006 jyldyń jeltoqsanynda Qatardaǵy Azııa oıyndarynda 94 keli salmaqta 401 keli nátıjemen chempıon atandy. 2008 jyly Beıjiń Olımpıadasynda jeńimpaz boldy. 2010 jyly Qazaqstannyń jáne Azııa oıyndarynyń chempıony. 2012 jyly London Olımpıadasynda álemdik jáne olımpıadalyq rekord jasap, ekinshi ret Olımpıada chempıony atandy.
– Ilııa Ilın ár jarystan kelgen saıyn Qyzylorda áýejaıynda kútip alatyn edik. Meniń sonda baıqaǵanym Ilıanyń anasy únemi jylap turady. Ilıa ziltemirdi kótererde anasy eki kózin tars jumyp alatynǵa uqsaıdy. Balasynyń beli qaıysqanyn kórgisi kelmeıdi. Jurt Ilıa ziltemirdi kóterdi dep qýansa, anasy Galına ulynyń bir jerin mertiktirmeı, aman kelgenin kórip jylaıdy. Myna sýret sonyń bir aıǵaǵy ispetti – deıdi jan tebirenterlik sýrettiń avtory Bolat Omarálıev.
Aınash ESALI,
«Egemen Qazaqstan»
ALMATY
Sýretti túsirgen
Bolat OMARÁLIEV
