Arqabaı týysy Ándirdiń úıindegi ala shubar dúrektiń qos kúshigin kórip qyzyǵa tústi. Alaıda áıeli Sýsulý álgi tyıymdy esine saldy. Onyń ústine ótken joly Ándirdiń ózi kúshikterin qaıta-qaıta maqtap Arqabaıdyń áýesin ketirgen. Osy dúrektiń kúshikteri tóbet shyǵady. Sebebi, ıtim Báıdiktiń Aqtyrnaq atty tóbetimen ylyqqan, – dep dáldik aıtqany bar. Báıdiktiń Aqtyrnaǵy degeni – dene turqy esik pen tórdeı zor tóbet ıt. Aqyry Arqabaı Ándir týysqanynyń úıine qaıta-qaıta barǵyshtap júrip qos kúshiktiń birin «zyp» etkizdi. Kúshikti dereý qoılaryn qosyp baǵatyn qoıshy Qospannyń aýylyna attandyrdy. Sodan kúshik jaz boıy qoıly aýylda erkin júrdi. Kúzge salym Arqabaı kúshikti qaıta aýylǵa aldyryp aldy. Ol ýaqytta jelkesi kújireıip, tisi aqsıyp, boıy tarala ósken qońqaq iri dúrekti Ándir túgili Arqabaıdyń ózi tanymaı qaldy. Týra enesi sııaqty ala shabyr dúrekke aınalǵan. Biraq bir jaman qasıeti ıtaıaǵyna jaqyndasań sıraǵyńnan ala túsedi. Jýyndysyn qyzǵana jeıdi eken. Qar túse soǵymnyń basy bastalyp qonaq shaqyrys bastaldy. Árıne, aǵaıyn-týys, kórshi-qolań túgel shaqyryldy. Kelgen qonaqtar astan keıin tysqa tynystaýǵa shyqty. Biri shaqshasyn shertip, biri shylymyn shymshylap ájik-gújik áńgimelesip turǵan bolatyn. Ittiń ıtaıaǵyna Ándirdiń qaıdan jaqyndaǵanyn kim bilsin, ala dúrek Ándir týysqanynyń tirseginen ala túsipti. Al kerek bolsa?! Ala quıyn shabylys bastaldy. Jedel járdem shaqyrylyp, Ándirdi salyp alyp ketti. Erteńine «qarǵy baýy qaıda?», «nege bos jiberesizder?» dep polısııa qyzmetkeri, odan «tólqujaty qaıda?», «vaksına egilgen be?» dep vetvrach kelip tur. Shaqshadaı basy sharadaı bolǵan Arqabaı aýdanǵa baryp qujat jınap, ıtin tekseristen tekseriske ótkizip júrgende otyz kún de óte shyǵypty. «Nesin aıtasyń kisini qutyrǵan ıt qapsa, otyz toǵyz kún ótip qyrqynshy kúni qutyrady eken» degendi estip ýaıymmen kún sanap júrdi. Sanaǵan otyz toǵyz kúni ótip, qyrqynshy kúni tańerteń Arqabaı uıqydan oıana sala Ándir týysynyń úıine asyǵa júgirdi. Asyqqanda jete alsaıshy. Ándirdiń áýlisine kirgende esiginiń aldynda qar kúrep júrgen Ándirdi kórip: «Qutyrmapty!», «Qutyrmapty!» dep týysyn qýana qushaqtaı aldy.
Sodan beri Arqabaı aǵaıyn túgili alystan ıt alyp asyramaıtyn boldy. Iá, Allanyń bergen az ǵumyrynda ıtshe yryldaspaı, kúshikshe sháýildespeı ótkenge ne jetsin!
Maqsat QARǴABAI
