Oǵan Premer-Mınıstrdiń orynbasary Asqar Jumaǵalıev, Aqparat jáne kommýnıkasııalar mınıstri Dáýren Abaev qatysty.
Memleket basshysy Nursultan Nazarbaev usynǵan «Sıfrly Qazaqstan» baǵdarlamasy arqyly azamattardyń saýattylyǵyn arttyrý kózdelip otyr. Jıynǵa qatysqan Aqparat jáne kommýnıkasııalar mınıstri Dáýren Abaev HQKO-nyń tıimdi tustary jaıly oı bólisti.
– Elektrondy HQO-nyń basty maqsaty – azamattardyń sıfrly tehnologııalar arqyly qajetti qujattaryna jyldam qol jetkizýin qamtamasyz etý. О́tken jyly HQO 37 mıllıonǵa jýyq adamǵa qyzmet kórsetipti. Al onyń 24 mıllıony elektrondy qujattardy tańdaǵan. Jyl ótken saıyn qyzmet kórsetýdiń elektrondy nusqasyna suranys kóbeıip keledi. Endi sıfrly HQO-ny elimizdiń ózge de qalalarynda ashýdy maqsat etýimiz kerek, – dedi Dáýren Abaev.
Aqparat jáne kommýnıkasııalar mınıstriniń aıtýynsha, buryn sheteldik azamattar Qazaqstanda jumys isteýi úshin qajetti qujattardy jınaýyna bes kún jumsaǵan. Odan bólek túrli mekemelerden ótýi tıis bolatyn. Al endi mıgrasııalyq HQO arqyly nebári bir-eki saǵatta bárin aıaqtaýǵa bolady.
Sol sııaqty vedomstvo basshysy mundaı ortalyqtardyń zańsyz eńbek mıgranttarynyń azaıýyna da septigi tıetinin atap ótti.
– Qazirgi ýaqytta zańsyz mıgranttar ózderiniń quqyqtaryn bilmeıdi. Al jumys berýshiler túrli kedergilerge baılanysty sheteldikterdi jumysqa ákelýden qorqatyn. Oǵan birden – bir sebep – qujat jınaý barysynda biraz ýaqyt jumsaýy. Al endi bári tez sheshiletindeı jaǵdaı jasalyp otyr. Sonymen qatar ınvestısııalyq tartymdylyǵymyzdy arttyrýǵa, týrısterdiń qataryn qalyńdatýǵa bolady degen oıdamyn, – dedi mınıstr.
Memleket basshysy Nursultan Nazarbaevtyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Joldaýynda «Jemqorlyqtyń aldyn alýǵa baǵyttalǵan kúres jalǵasa beredi. Kóp jumys istelip jatyr», delingen. Al eńbek mıgrasııasynda kóleńkeli tustardyń da joq emestigi belgili. Dáýren Abaev óz sózinde mıgrasııalyq jáne sıfrly HQO arqyly osy kemshilikti joıýǵa bolatynyn jetkizdi.
Astana qalasy IID kóshi-qon basqarmasynyń basshysy Erketaı Tutqyshevtiń aıtýynsha, ótken jyly ýaqytsha tirkeýden 160 myń shetel azamaty ótipti, sondaı-aq 11 myńy zańsyz júrgendikten jaýapqa tartylǵan. Al onyń ishinde 1800-i sot sheshimi boıynsha elimizden shyǵarylypty. Qazaqstanǵa jumys isteý maqsatynda kelgenderdiń 70 paıyzy ózbekstandyqtar eken.
Astana qalasynyń A.Imanov kóshesinde ornalasqan mıgrasııalyq HQO saǵat 09:00-18:30 aralyǵynda úzilissiz jumys isteıdi. Munda azamattardyń medısınalyq tekseris pen daktıloskopııadan ótýine, saqtandyrý polısin resimdeýine, sáıkestendirý nómirin alýyna jaǵdaı jasalǵan. Sondaı-aq azamattardyń sıfrlyq saýatyn ashý maqsatynda tegin sabaqtar da ótkiziledi. Ol aptanyń ár kúninde bekitilgen taqyryptar boıynsha júrgiziledi. Bir saǵatty quraıtyn kýrsta elektrondy úkimet portalyn paıdalaný tásilderi túsindiriledi, sondaı-aq memlekettik qyzmetterge qol jetkizý joldary úıretiledi.
Aıan ÁBDÝÁLI,
«Egemen Qazaqstan»
