Ár jyl saıynǵy Prezıdent Joldaýy óz jańalyqtarymen, qundy ıdeıalarymen, elimizdiń jańǵyrýyna, kórkeıýine negiz bolatyn salmaqty tujyrymdarmen erekshelenedi.
Qazaqstan Respýblıkasynyń Prezıdenti N. Á. Nazarbaev 2018 jyldyń 11 qańtarynda «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» taqyrybynda Qazaqstan halqyna kezekti Joldaýyn jarııalady. Elbasynyń bıylǵy Joldaýy – elimizdiń órkendeý jolyndaǵy buǵan deıingi usynylyp, júzege asyrylyp jatqan qarqyndy reformalardyń, atap aıtqanda, «Máńgilik El», «100 naqty qadam» Ult jospary, «Sıfrlyq Qazaqstan» baǵdarlamalarynyń zańdy jalǵasy. «Qazaqstan álemdegi túrli synaqtarǵa tótep berip, qarqyndy ekonomıkalyq damý jolyna bet aldy. Elimizdiń 2050-shi jylǵa deıingi uzaq merzimdi Damý strategııasy júzege asyrylýda. 100 naqty qadam Ult jospary aıasynda biz reformalardy júrgizip kelemiz. Indýstrııalandyrý salasyn órkendetý úshin júıeli jumystar atqarylýda. Biz konstıtýsııalyq reformany júzege asyryp, elimizdiń Úshinshi jańǵyrýyn bastadyq. Rýhanı jańǵyrý baǵyty boıynsha keshendi is-sharalar júrgizilýde. «Sıfrlyq Qazaqstan» baǵdarlamasy qabyldandy», – dedi N. Á. Nazarbaev Joldaýynda.
Elimiz óziniń táýelsizdik alǵannan bergi 26 jyldyq damý kezeńinen abyroımen ótip, halyqaralyq arenada bıik belesterdi baǵyndyrdy. О́ziniń ekonomıkalyq damý qarqynyn aldyńǵy qatarly ozyq elderdiń qataryna qosylýymen dáleldedi. Prezıdent taldap kórsetkendeı, adamzat jańa ónerkásiptik revolıýsııa dáýirine aıaq basqan tusta memleketimiz rýhanı jańǵyrý jolynda berik negiz qalady.
Endigi kózdeletin meje – tórtinshi ónerkásiptik jańǵyrý bolmaq. Joldaýdyń taqyryby aıtyp turǵandaı, búgingi kúni qoǵam da, memleket te, tipti azamattarymyzdyń oı-sanasy da kezekti ónerkásiptik ózgeris jaǵdaıyndaǵy damýdyń jańa múmkindikterin bastan ótkeretin kezeńge keldi.
Elbasy Joldaýynda usynylǵan el damýynyń basty baǵyty – sıfrlandyrý, ıaǵnı Qazaqstandy jańa álemdegi kóshbasshy elderdiń qataryna kirgizý úshin ómirdiń barlyq salasyna sıfrlyq tehnologııany belsendi engizý qajet. Memleket basshysy bıylǵy Joldaýynda eldiń ekonomıka jáne áleýmettik salalaryndaǵy kún tártibinde turǵan kezek kúttirmeıtin asa mańyzdy 10 mindetti belgilep berdi. Bul mindetter – bıik belesterdi baǵyndyrýǵa jeteleıtini sózsiz. Joldaýda Qazaqstannyń ındýstrııalyq órkendeýine, agroónerkásip kesheni men kólik-logıstıka ınfraqurylymynyń damýyna, bank sektorlarynyń qaıta jańǵyrtylýyna asa kóńil bólingen.
Memleket basshysynyń Joldaýynda dástúrli áleýmettik damý máseleleri de nazardan tys qalmady. Qazirgi tańda áleýmettik salada sıfrlyq tehnologııalardy damytýdyń mańyzy zor. Qurylysqa jáne kommýnaldyq sektorǵa zamanaýı tehnologııalardy engizý, aldyńǵy qatarly bilim júıesin qurý, medısınalyq kómektiń qol jetimdiligi men tıimidiligin arttyrý, halyqtyń sapaly jumyspen qamtylýy – munyń bári mindetti túrde bizdiń azamattarymyzdyń ómir súrý deńgeıin kóteretini anyq.
Adamzat balasynyń qol jetkizgen uly ıgilikteriniń barlyǵy – bilim, oqý men toqý arqyly jasalǵan. Bilim alý sıpaty alýan túrli ekenin eskersek, zamanaýı bilim berý júıesiniń maqsaty – básekege qabiletti, jan-jaqty, kóp til biletin maman daıyndaý ekeni belgili. Bıylǵy Joldaýynda Memleket basshysy bilim berýdiń jańa sapasyna asa nazar aýdarady. Bul Joldaýda bilim qoǵamyn damytýǵa arnalǵan qundylyqtar qatarynda barlyq jastaǵy azamattardy qamtıtyn bilim berý isinde ózimizdiń ozyq júıemizdi qurý, zamanaýı tehnıkalyq turǵydan qoldaý kórsetý, sıfrlyq bilim berý resýrstaryn damytý, ózgeristerge únemi beıim bolý jáne jańa bilimdi meńgerý qabiletin damytý, baǵdarlamalardyń biryńǵaı standarttaryn engizý, orta bilim berý salasynda jańartylǵan mazmunǵa kóshý, pedagogtardy oqytý jáne olardyń biliktiligin arttyrý joldaryn qaıta qaraý, bilim berýdiń barlyq deńgeıinde matematıka jáne jaratylystaný ǵylymdaryn oqytý sapasyn kúsheıtý, latyn álipbıine kóshý mindetterin naqtylady. «Jańartylǵan mazmun degenimiz – halyqaralyq standarttarǵa saı keletin jáne Nazarbaev zııatkerlik mektepterinde beıimdelýden ótken zamanaýı oqý baǵdarlamalary», – dedi Elbasy.
Jalpy, bıylǵy Joldaýdyń mazmuny basty mindetterdi júzege asyrýda barlyq azamattardyń belsendi atsalysýyn talap etedi. Prezıdent Joldaýy – árbir qazaqstandyq úshin qarqyndy umtylystyń joly bolmaq. Prezıdent Joldaýyndaǵy jańa baǵyttar elimizdiń áleýmettik-ekonomıkalyq damýyna erekshe serpin beretinine kámil senemin.
Ámirhan RAHYMJANOV
Qazaqstan Respýblıkasynyń Tuńǵysh Prezıdenti – Elbasy kitaphanasy dırektorynyń orynbasary, saıası ǵylymdardyń doktory, professor
