Qazaqtyń qaısar ǵalymynyń esimimen Astanadaǵy bir kósheniń atalýyna baılanysty búgin Qazaq tehnologııa jáne bıznes ýnıversıtetinde Astanada «Qaıym Muhamedhanov - Abaıdyń inisi, Alashtyń irisi» atty semınar ótti. Semınarǵa ǵalym Ǵarıfolla Esim, aqyn Nesipbek Aıtuly, ǵalymnyń urpaqtarynan Degdar Qaıymuly, Dına Qaıymqyzy men Qarlyǵash Qaıymqyzy qatysty.
«Tabıǵatynan taza, áýelgiden-aq ádil, qaısar ǵalym ári ustazymyz Qaıym Muhamedhanovtyń qurmetine berilgen kósheniń ashylý saltanatyna jınalyp otyrmyz. О́z ómirinde qýǵyn-súrginniń san azabyn tartsa da, ustazy Áýezovti ustap bermeı, satqyndyq jasamaı, túrmege túsken, naǵyz ǵalymǵa tán qaısar minez kórsetken Qaıym aǵamyzǵa qashan da qurmet kórsete bilýimiz kerek», - dedi semınarda sóz sóılegen aqyn Nesipbek Aıtuly. Qaıym Muhamedhanovqa berilgen kóshe Elordanyń Esil aýdanynda ornalasqan. Naqtyraq aıtqanda, Qorǵaljyn tas jolymen qatarlas jatqan kóshe Sh. Aıtmatov kóshesimen qıylysady.
«Qaıym Muhamedhanov Abaıdyń mektebi bolǵanyn dáleldegen tulǵa. Sonaý Qaraýylda otyryp Abaıdyń balalary álemdik máseleni kóteredi. Paıǵambar joq, adamzat qaıda adasyp barady? Aldaǵy baǵyty qandaı, mine, osyndaı oılardy Abaıdyń aınalasy aıta bildi. Bul degenińiz tańǵajaıyp dúnıe emes pe?» - deıdi óz sózinde Ǵarıfolla Esim.
Aıta ketsek, Qaıym Muhamedhanov 1916 jyly 5 qańtarda Semeı qalasynda dúnıege kelgen. Kóp jyl boıy Abaı murajaıynyń dırektory qyzmetin atqarǵan, «Abaıdyń ádebıet mektebi» taqyrybyna kandıdattyq dıssertasııa qorǵaǵan. Ádebıet zertteýshi ǵalym retinde Abaı murasynyń tekstologııalyq zertteýlerine mol úles qosty. Abaı tóńiregindegi ataqty ánshiler: Kókbaı, Aqylbaı, Maǵaýııa týraly, ótken zamannyń keıbir muralary jaıynda zertteýler, kólemdi maqalalar jazdy. Ol - Qazaqstannyń Memlekettik syılyǵynyń, Jazýshylar odaǵy syılyǵynyń, Halyqaralyq «Alash» ádebı syılyǵynyń jáne Halyqaralyq Abaı akademııasynyń (London) Altyn medaliniń ıegeri, professor, KSRO jáne Qazaqstan halyq aǵartý isiniń úzdigi. 2004 jyly dúnıe salǵan.
