Osy oraıda Qazaqstan halqy Assambleıasy ústimizdegi jyldyń 12 qańtarynda Qazaqstan Respýblıkasy Prezıdenti N.Á.Nazarbaevtyń «Tórtinshi ónerkásiptik revolıýsııa jaǵdaıynda damýdyń jańa múmkindikteri» atty Joldaýyn talqylaý boıynsha respýblıkalyq biryńǵaı kún ótkizgenin atap kórsetken jón.
Assambleıa ótken juma kúni Almatydaǵy Dostyq úıinde Elbasynyń Qazaqstan halqyna Joldaýyn talqylap, túsindirý úshin Biryńǵaı taqyryptyq kúnin ótkizdi.
Almatydaǵy is-sharaǵa Qazaqstan halqy Assambleıasy Tóraǵasynyń orynbasary Abılfas Hamedov táýelsiz Qazaqstan ómirinde, tolassyz zýlap jatqan ýaqyt bederinde túrli maqsattar men kóp qyrly, jan-jaqty josparly tapsyrmalar týyndap jatatynyn jáne munyń bári Joldaýda kórinis tabatytyn aıta kele bizdiń elimiz naqty tabystarǵa ıe: Qazaqstan BUU Qaýipsizdik Keńesine múshe boldy, Dúnıejúzilik qysqy Ýnıversıadany atqardyq EKSPO-2017 halyqaralyq kórmesi de sátti uıymdastyryldy, jyl basynda Elbasynyń bastamasymen konstıtýsııalyq reforma ótti, el ekonomıkasyn jańa beleske shyǵaratyn Qazaqstannyń úshinshi jańǵyrýyna serpin berildi, mazmuny tereń, aýqymdylyǵy boıynsha asa qundy «Bolashaqqa baǵdar: rýhanı jańǵyrý» baǵdarlamalyq qujaty boıynsha jumystar jalǵasýda, dedi.
– Prezıdent Nursultan Nazarbaevtyń bıylǵy Joldaýy Qazaqstannyń keleshegi úshin ólsheýsiz mańyzǵa ıe dep esepteımin. Elbasy belgilep bergen memlekettik saıasattyń strategııalyq baǵyttary barlyq salanyń basty saýaldaryna jaýap bere alady. Bul kezekti Joldaý kópultty, kópkonfessııaly Qazaqstandy jańa kezeńge, jańa beleske bastaıdy. Prezıdent pármen berip otyrǵan árbir tapsyrma zamana naqtylyǵyn bezbendeıdi. Elimiz úlken maqsattarǵa jetý jolyndaǵy tarıhı múmkindikterge ıe, – dedi Almaty qalalyq QHA tóraǵasynyń orynbasary Kazbek Mamsýrov.
– Adam kapıtaly týraly aıtqan kezde, tek bilim men densaýlyq salasyn meńzemeý kerek. Bul «Bolashaqqa baǵdar: rýhanı jańǵyrý» baǵdarlamasynyń jalǵasy ekenin de umytpaǵan jón. Mundaı jalǵasty josparlar qoǵamdy birtindep jańa belesterge kóteredi. Joldaý azamattarymyzdyń barlyq býynyn qamtıtyn bilim berý salasynyń kókjıegin naqty belgilep otyr. Bizdiń qoǵamnyń negizgi kúshi tarıhty da, tildi de, mádenıetti de biletin qazaqstandyq bolýy kerek, – dedi Qazaqstan kúrdteriniń «Barbang» qaýymdastyǵynyń tóraǵasy Knıaz Mırzoev.
Osylaısha Qazaqstan halqy Assambleıasynyń elimizdiń túkpir-túkpirindegi Joldaýdy talqylaýǵa qatysty Biryńǵaı kúni – áleýmettik-ekonomıkalyq tabystyń negizinde azamattyq tatýlyq, ultaralyq jáne konfessııaaralyq kelisim jatqanyn kezekti ret aıqyndap otyr.
Sondyqtan da búkil el boıynsha Dostyq úıleriniń bazasynda Assambleıa keńesteri, ǵylymı-sarapshylyq toptar, Qoǵamdyq kelisim, Aqsaqaldar, Analar keńesteri, QHA jastar qanattarynyń otyrystary, konferensııalar, dóńgelek ústelder, sarapshylarmen kezdesýler syndy is-sharalar ótti. Bul jıyndar tek oblys ortalyqtarynda jáne iri qalalarda ǵana emes, sondaı-aq aýdandarda, kásiporyndar men joǵary oqý oryndarynda da jalǵasty.
El Prezıdentiniń Joldaýyn talqylaýǵa Qazaqstan kúrdteriniń «Barbang» qaýymdastyǵy, Almaty qalalyq QHA fılıaly, Almaty koreıleri ulttyq ortalyǵy, qazaqstandyq orystardyń mádenı ortalyǵy, Almaty qalalyq «Ahyska» túrik ortalyǵy qatysty.
Tap sol kezde Aqtóbe qalasynda, Qazaqstan halqy Assambleıasy Tóraǵasynyń orynbasary Sergeı Vıshnıaktiń jáne Qazaqstan halqy Assambleıasy músheleriniń, ǵylymı-saraptamalyq top, qoǵamdyq kelisim, Analar keńesi, 19 etnomádenı birlestik ókilderiniń qatysýymen oblystyq QHA Keńesiniń keńeıtilgen otyrysy bolyp ótti.
Atyraý, Shyǵys Qazaqstan, Qostanaı jáne basqa da oblystarda Biryńǵaı kún sheńberinde aýdandyq mańyzy bar qalalar men aýyldarda ózin-ózi basqarýdyń derbes bıýdjeti men kommýnaldyq menshigin engizý syndy halyqtyń ózekti máselelerin sheshý joldary talqylandy. QHA úshin aýyldyq okrýgter men aýyldar deńgeıinde qurylǵan Qoǵamdyq kelisim keńesteri jergilikti mindetterdi sheshýde jańa múmkindikterge ıe bolatyndyǵy mańyzdy.
Birneshe oblysta (Qaraǵandy, Qyzylorda, Mańǵystaý jáne t.b.) Parlament Májilisiniń Assambleıadan saılanǵan depýtattarynyń (S.Abdrahmanov, N.Jumadildaeva, A.Mýradov, Sh.Nýrýmov jáne t.b.) qatysýymen oblystyq selektorlyq jıyn ótkizildi. Olar Joldaýdyń túıindi máselelerine qatysty óz kózqarastaryn bildirip, turǵyn úı qurylysy, bank salasy, bilim berý men áleýmettik salaǵa zamanaýı tehnologııalardy belsendi engizý máseleleriniń mańyzdylyǵyn atap kórsetti. Biregeı elektrondy eńbek bırjasyn engizýdiń mándiligin, onda bos oryndar men jumys izdep júrgen tulǵalar týraly barlyq aqparat shoǵyrlandyrylýy tıis ekendigin, «Barshaǵa arnalǵan tegin kásiptik-tehnıkalyq bilim berý» jobasyn iske asyrýdyń qoǵamǵa qajettiligin sóz etip, áleýmettik damý máselelerine kóńil bóldi.
Biryńǵaı kún sheńberinde ótken Qazaqstan halqy Assambleıasynyń 147 is-sharasyna 7300-den astam adam qatysty.
Aınash ESALI,
«Egemen Qazaqstan»
ALMATY
