Sóz basynda Prezıdent: «Bul kitap meniń uly qoldaýshym, kemel keleshegine óziniń qazaqstandyq jolymen qaryshtaǵan jasampaz halqyma arnalady!» dep, kitaptyń mazmunyn aıqyndap bergen. Jańa týyndyda egemen memlekettiń negizi qalanǵan kúnnen bastap onyń qalyptasý kezeńderiniń erekshelikteri men 26 jyldyq táýelsizdik dáýirindegi ishki jáne syrtqy syn-qaterlerdi eńserýge baılanysty qabyldanǵan sheshimderdiń mán-mazmuny men tetikteri egjeı-tegjeıli baıandalady. Sonymen qatar kitapta «Qazaqstandyq damý úlgisiniń» tabıǵaty men onyń evolıýsııasy, basty ustanymdary men qozǵaýshy kúshteri saralanǵan. Qazaqstandy jańǵyrtýdyń úsh tolqyny keńinen ashyp kórsetilgen. Birinshi jáne ekinshi jańǵyrtý aıasynda totalıtarlyq júıeden túbegeıli ajyrap, naryqtyq ekonomıkany qurý jáne básekege barynsha qabiletti elý eldiń qataryna qosylý mindeti merziminen buryn oryndaldy.Úshinshi jańǵyrtýdyń maqsaty – elimizdi qalyptasqan jańa jahandyq ahýal jaǵdaıynda jańǵyrta otyryp, álemdegi eń órkendi 30 memlekettiń qataryna qosý.
Kitap elimizdiń jańa tarıhyn tutas qamtyǵan, mazmuny asa baı 4 bólimnen turady. Kitaptaǵy ár bólimniń ózi birneshe bólimderge bólingen. Olardyń da ataýlaryna asa mán berilip, jańa tarıhymyz ben qazaqstandyq qundylyqtardyń dáýirlik oqıǵalary naqty ári dál sýrettelgen. Kitaptyń taraýlary: «Tarıhı ádilettilik saltanaty», «Tuǵyry berik memlekettik qurylym», «Basty qundylyǵymyz – beıbitshilikti qasterleı bildik», «Jańalyqtyń jyly lebi jáne qaıta túlegen dástúr», «Qııaǵa kóz tikken Qazaqstan barysy», «Baıandy bolsyn Bas qala!», «Táýelsizdik rýhymyzdy shyńdady», «Buryn-sońdy bolmaǵan zııatkerlik órleý», «Álem moıyndaǵan kóshbasshylyq», «Kóz aldymyzdaǵy uly ózgerister», «Jańa ekonomıkaǵa batyl umtylys», «Adam kapıtalynyń jańa sapasy», «Qazaqstannyń aıqyn jáne myzǵymas basymdyqtary» jáne taǵy basqa bólimderde elimizdiń jarqyn sátteri búge-shigesine deıin baıandalady. Sondaı-aq kitapta elimizdiń táýelsizdik jyldarynda qol jetkizgen basty 33 jetistigi men oǵan jetý joldary jan-jaqty aıtylǵan. Bul jetistikterdiń barlyǵy táýelsizdiktiń jemisi jáne Elbasymyzdyń eli úshin atqarǵan eren eńbeginiń nátıjesi.
«Táýelsizdik dáýiri» otandyq jáne sheteldik qalyń oqyrman qaýymdy qyzyqtyrar tyń týyndy. Elbasynyń júrek tórindegi tolǵanystarynan shyqqan bul kitapty bárimizdiń qasıetti Otanymyz – Qazaqstan Respýblıkasynyń negizin qalaǵan Tuńǵysh Prezıdentimizdiń óz qolymen jazylǵan Táýelsizdik ensıklopedııasy dep ataýǵa tolyq negiz bar
Bizdiń aldymyzda zor mindetter tur. Onyń eń bastysy – Elbasy aıqyndap bergen Qazaqstandy álemniń damyǵan 30 eli qataryna qosý bolyp tabylady. Osy asýdy biz Prezıdentimizben birge alatynymyzǵa senimdimiz. Elbasymyz: «Bizde rýh baılyǵy bar. Ol bárinen buryn – otanshyldyq sezim, qazaqstandyq patrıotızm. Onyń basty ólshemi – tatýlyq, tynyshtyq, turaqtylyq», degen bolatyn. Ortaq Otanymyz, baǵanaly ordamyz – Qazaqstannyń bosaǵasyn berik, shańyraǵyn bıik ustap, tútinin túzý ushyrý – eldik maqsat.
Endeshe «Baq bererde elge yrys qonady, ustanǵan joly durys bolady», degen Elbasy Nursultan Ábishulynyń alǵa qoıǵan maqsat-mindetterin oryndaýda jalpaq jurtty jumyldyrýy memleketshil qyzmetkerdiń mindeti ǵana emes, qasıetti paryzy bolýy kerek. Biz osy týra joldamyz!
Ǵalıasqar SARYBAEV,
«Nur Otan» partııasy Almaty oblystyq fılıaly tóraǵasynyń birinshi orynbasary
