Saltanatty sharaǵa Qazaqstan Respýblıkasy Joǵarǵy Sotynyń janyndaǵy sottardyń qyzmetin qamtamasyz etý departamentiniń basshysy Nurserik Sháripov, Jambyl oblystyq sotynyń tóraǵasy Rústem Myrzakárim, sot júıesiniń ardageri Qudaıbergen Úsenbaev qatysyp, jańa ǵımarattyń lentasyn qıdy. Sonymen qatar, atalǵan sharaǵa oblys boıynsha sottar ákimshisiniń basshysy Berik Qultasov, aýdan ákiminiń mindetin atqarýshy Ábdikerim Úrkimbaev, sondaı-aq quqyq qorǵaý organdarynyń jetekshileri, «Nur Otan» partııasy fılıalynyń qyzmetkerleri, sýdıalar men sala ardagerleri jáne úkimettik emes uıymdardyń ókilderi men aýdan turǵyndary qatysyp, qoldaý bildirdi.
Nurserik Sháripov óziniń quttyqtaý sózinde memlekettiń sot bıliginiń órkendeýine ólsheýsiz qoldaý kórsetip otyrǵanyn aıta kele, keıbir azamattardyń sot júıesimen baılanysýyna týra keletinin, sondyqtan sot olar úshin sádildikke jetýdiń sońǵy úmiti ekenin de aıtyp ótti. Al Rústem Myrzakárim sot qyzmetkerlerin quttyqtap, 1984 jyldan beri yńǵaılastyrylmaǵan eski ǵımaratta ornalasqan aýdandyq sot ujymynyń endi tyń serpinmen qyzmet eteninine senim bildirdi.
Jańa ǵımarattyń jalpy alańy 1482,9 sharshy metr bolsa, jalpy quny 288 mıllıon teńgeden astam qarjyny quraıdy. Irgetasy ótken jyldyń maýsym aıynda qalanyp, jyl basynda paıdalanýǵa berilgen sot ǵımaratynda zamanaýı talapqa saı salynǵan úsh sot májilisi zaly, sýdıalardyń keńesý bólmeleri, kútý zaldary, prokýror men advokattardyń kabınetteri bar. Sondaı-aq, muraǵat pen ashana da jańa ǵımarattan oryn alǵan.
Hamıt ESAMAN,
«Egemen Qazaqstan»
