Jańa ken oryndary kompanııanyń alıýmınıı dıvızıony quramyndaǵy Pavlodar alıýmınıı zaýytyn shıkizatpen qamtamasyz etip, kásiporynnyń óndiristik qýatyn saqtaýǵa yqpal etedi.
Atalǵan nysyndardyń qurylysy eki jyl buryn qolǵa alynǵan bolatyn. Mysaly, KBKB Krasnogor kenishiniń №17 jańa karerindegi taý-ken jumystary 2016 jylǵy qańtarda bastalǵan edi. Táýligine 18 myń tekshe metr shamasynda taý-ken massasy tıeldi. Arshylatyn jynystyń jalpy kólemi 53 mln tekshe metrden astam bolatyn. Karerdiń uzyndyǵy – 2 shaqyrym, eni – 0,9 shaqyrym, tereńdigi – 111 metr. Karer qurylysymen qatar boksıt tógetin qoımaǵa aparar kólik joly tóselip, sý tartqysh jáne kerneýi 6 kV elektr qýatynyń úsh jelisi tartyldy. Qazir №17 karerdegi kenniń alǵashqy tonnasy óndirildi. 2018 jyldyń basynan qarqyndy jumys úderisi júrýde, bes ekskavator, toǵyz avtosamosval, úsh býldozer men bir avtogreıder iske jumyldyrylǵan. Osy karerden jylyna 1 mln tonnaǵa deıin boksıt keni óndirý josparlanyp otyr.
Al, Aıat kenishiniń №9 karerinde boksıttiń óndirisi qańtar aıynyń sońynda bastalmaq. Bul karerdiń uzyndyǵy – 700 metr, eni – 600 metr, tereńdigi – 119 metr bolady. Jarylys jumystarynan keıin boksıt kenin óndirý bastalady. Avtojol, sorǵy stansııasy, sý burǵysh, elektr qýaty jelisi, jaryqtandyrý úshin baǵandar qurylysy aıaqtalǵan. Búginniń ózinde karerde eki ekskavator, tórt avtosamosval, býldozer jáne avtogreıder jumys isteýde.
«Jańa karerlerdiń qurylysyna 6 mıllıard teńgeden astam ınvestısııa jumsaldy. Joba Aıat jáne Krasnogor kenishteri qýatyn jáne shıhtanyń sapaly kórsetkishterin saqtaý, 2018 jylǵa arnalǵan óndiristik jospardy tolyq oryndaý úshin júzege asyryldy. Biz óndiristik kórsetkishterdi oryndaýǵa jáne Pavlodar alıýmınıı zaýytyna boksıtti jetkizýge daıynbyz» dedi «Qazaqstan alıýmınııi» AQ fılıaly Krasnooktıabr boksıt ken basqarmasynyń dırektory Sergeı Shelokov.
Qazir Krasnooktıabr boksıt ken basqarmasynyń Shyǵys Aıat ken ornynda taǵy bir karerdiń qurylysy júrip jatyr. Bul – №4 karer. Taý-ken qurylys jumystary 2017 jyly bastaldy jáne jospar boıynsha 2020 jylǵa deıin jalǵasady.
Názıra Járimbet
«Egemen Qazaqstan»
Lısakov
