Sýret Polsha Prezıdentiniń resmı saıtynan alyndy
Sóz basynda Andjeı Dýda óte mańyzdy taqyrypta joǵary deńgeıde pikirtalas uıymdastyrǵan Qazaqstanǵa alǵys aıtty. «Bul sizdiń uzaq ýaqyt boıy qaýipti qarýdy taratpaýǵa tyrysqan eńbegińizdi kórsetedi. Iаdrolyq qarýdan bas tartqan memleket retinde Qazaqstan osy máseleni óz deńgeıinde talqylaýǵa atsalysady degen senimdemin. Sebebi Qazaqstan sekildi ıadrolyq qarýdan bas tartqan memleketter óte az», deı kele Andjeı Dýda Nursultan Nazarbaevtyń sol kezderi sóılegen sózin eske aldy. «Nursultan Nazarbaev alǵash ret ıadrolyq qarýdan bas tartý týraly sheshimin jarııalaǵanda, bul óziniń memleketi úshin jasaǵan eń jaqsy tańdaýy ekenin aıtqany esimde. Sol kezden beri Qazaqstan óziniń sheshimine berik ekenin kórsetti. Sonymen qatar men Qazaqstannyń jaqynda tómen baıytylǵan ýran bankin qurǵanyn atap ótkim keledi. Bul ıadrolyq qaýipsizdikti qoldaý jolyndaǵy mańyzdy qadam jáne bul beıbitsúıgish memleketter arasyndaǵy ashyq qarym-qatynasty nyǵaıtady», dedi Polsha Prezıdenti.
Andjeı Dýda BUU Qaýipsizdik Keńesine shaqyrǵany úshin Nursultan Nazarbaevǵa alǵysyn bildirdi. «Men Polsha Prezıdenti retinde BUU-na birinshi ret kelip otyrmyn. Búgingi qarastyrylyp jatqan máseleler Polshanyń Qaýipsizdik Keńesindegi basymdyqtarymen baılanysty. Onyń ishinde halyqaralyq qaýymdastyqqa múshe memleketterdiń agressııaly jáne zańsyz áreketterine qarsy halyqaralyq quqyqtyń jańa joldaryn qoldaý da qarastyrylǵan. Meniń oıymsha, kez kelgen zańsyz áreketti halyqaralyq erejelerdi buzý dep qabyldaý kerek. Sebebi ondaı áreketter memleketterdiń beıbit qatym-qatynastaryn buzady», dedi A.Dýda.
Polsha Prezıdentiniń aıtýynsha, BUU Qaýipsizdik Keńesi otyrysyndaǵy kún tártibindegi máselelerdiń barlyǵy óte mańyzdy. Sonymen qatar tek ıadrolyq qarý emes, bıologııalyq jáne hımııalyq qarýdyń, ballıstrıkalyq raketanyń da qaýpin eskerý kerek. «Biz hımııalyq qarýdyń qoldanylatyn kezderin jıi kezdestirip jatamyz. Qaýipsizdik Keńesi álemge osy máselege baılanysty úndeý jarııalaǵany jón», dedi A.Dýda. Sonymen qatar Polsha Prezıdenti Soltústik Koreıanyń áreketterin aıyptap, 2018 jyly Ońtústik Koreıada ótetin Olımpıada oıyndarynyń qaýipsiz jerde, barlyq memleketter arasyndaǵy dostyq jáne beıbit qarym-qatynasta ótkeni durys dep oılaıtynyn aıtty.
Sóz sońynda Polsha Prezıdenti otyrysqa búkil álem elderi úshin mańyzdy taqyrypty tańdaǵanyna alǵys aıtty. «Polsha sizdiń ıadrolyq qaýipsizdikke baılanysty bastamalaryńyzdy qoldaıdy. Mundaı qarý shekaralardy buzyp, álemdegi beıbitshilikke qaýip tóndiredi. Sondyqtan biz BUU aıasynda áriptestik qarym-qatynasty nyǵaıta berýimiz kerek», dedi A.Dýda.
