Kórme 1990 jyly qańtardyń 19-ynan 20-na qaraǵan túni Bakýde bolǵan qandy oqıǵaǵa arnalyp otyr. Ázerbaıjan Respýblıkasynyń elshiligi kelýshiler nazaryna qaıǵyly túnniń kórinisterinen quralǵan fotoıllıýstrasııany usyndy.
«28 jyl buryn qańtardyń 19-ynan 20-na qaraǵan túni KSRO basshylyǵynyń buıryǵymen Bakýge áskerler kirgizilip, onda tótenshe jaǵdaı engizildi. Osy túnniń saldarynan bolǵan qandy oqıǵa Ázerbaıjan tarıhynda «Qara qańtar» degen atpen qaldy. 1990 jyldyń 20 qańtaryndaǵy oqıǵa KSRO-nyń ydyraýyn jyldamdatty jáne Ázerbaıjannyń táýelsiz memleket retinde qurylýyna septigin tıgizdi. Bul oqıǵa ázerbaıjan halqynyń rýhyn syndyrmady, qaıta senimdiligin arttyrdy. Bul táýelsizdik jolyndaǵy kúres edi», - dedi Qazaqstandaǵy Ázerbaıjannyń elshisi Rashad Mamedov.
Osy oqıǵa barysynda qaza tapqan, jaralanǵan jáne habarsyz ketken adam sany 1800-den asty. Olardyń kóbi ázerbaıjandar, sondaı-aq, orys, tatar, evreı halqynyń ókilderi, áıelder men jas balalar, qarttar boldy. Bul qandy oqıǵa ázerbaıjan-armıan halyqtary arasyndaǵy ult arazdyǵynyń asqynýyna sebep boldy. Bakýge kirgizilgen ásker quramynda kóbi armıan halqynan shyqqan soldattar men ofıserler bolǵany anyqtaldy. Keńestik bılik organdarynyń ult arazdyǵyn qandy oqıǵaǵa astastyrǵan bul sheshimi KSRO Konstıtýsııasyn, halyqaralyq-quqyqtyq normalar men Adam quqyqtarynyń jalpyǵa ortaq deklarasııasy erejelerin óreskel buzý, Ázerbaıjan eliniń quqyqtaryn, respýblıka zańdaryn aıaqasty etý dep sanalyp, halyqaralyq áleýmet tarapynan qatań aıyptaldy.
Ázerbaıjanda jyl saıyn 20 qańtar kúni qaıǵyly kún retinde eseptelip, búkil halyq aza tutady.
