Mektep jasyndaǵy balalardy erte jastan damytý boıynsha bizdiń aldymyzǵa úlken mindet qoıylyp otyr. Bul máseleni ata-analar da kóterip júrgen. Osy másele boıynsha biz tıisti oqý baǵdarlamalaryna ózgerister engizýimiz kerek. Sonymen qatar, erte oqý, erte jazý, jan-jaqty damytý boıynsha talaptardy kúsheıtemiz. Ol úshin, árıne biz muǵalimderdiń sanattaryn arttyryp, biliktiligi men bilimin shyńdaý maqsatynda jumys isteýimiz kerek. Oqý ádistemelik bazasyn jańǵyrtýymyz qajet. Osy turǵydaǵy jumystardy mınıstrlik bastap ketti.
Kelesi bir másele – oqýshylardyń oqý júktemesin azaıtý. Bul másele de kúzden bastap óte qyzý talqylanǵan taqyryptardyń biri boldy. Ata-analar tarapynan bizdiń mınıstrlikke kóptegen hattar kelip tústi. Elbasynyń bıylǵy Joldaýynda da bul másele qozǵaldy. Mınıstrliktiń aldyna, jalpy bilim salasynań aldyna birqatar maqsat-mindetter qoıyldy. Shynynda da júkteme óte kóp. Basqa memlekettermen salystyrsaq ta, TMD elderi bolsyn qaı-qaısymen salystyrsaq ta Qazaqstan mektepteriniń oqý júktemesi óte úlken. Sondyqtan da búgingi tańda qysqartý jumysy boıynsha másele qarastyrylyp, qazir sheshim qabyldaýǵa daıyndap jatyrmyz. Biz oqý júktemesin qysqartqanda eń birinshi sarapshylarmen, pedagogtarmen, ata-analarmen kelisip, aqyldasyp sodan keıin ǵana sheshim shyǵaratyn bolamyz. Bul bir jaqtan qabyldanatyn másele emes. Sondyqtan osyndaı tártippen sheshim qabyldanatyn bolady. Biz oılastyryp jatqan taǵy bir másele bar. Bul oraıda mektepter ózderi tańdaıtyn birneshe oqý josparyn usynatyn bolamyz», dedi ol.
Sondaı-aq Bilim jáne ǵylym vıse-mınıstri Bıbigúl Asylova qazirgi ýaqytta elimizde 125 jekemenshik mektep jumys isteıtinin, olardyń júktemesi 60 paıyzǵa jýyq ekenin tilge tıek etti.
«Bizde memlekettik tapsyrysty ornalastyrýǵa qor bar jáne bul memlekettik mektepterdiń júktemesin azaıtady. Qazirgi kúni memlekettik mekemeler bolyp tabylatyn mektepterdiń basqarýshylyq-qarjylyq derbestigin keńeıtý maqsatynda mektepterdiń jańa uıymdastyrýshylyq-quqyqtyq formasyn engizý, sharýashylyq júrgizý quqyǵyndaǵy memlekettik kásiporyndarǵa aınaldyrý josparlanýda. Bul úrdis satylap jáne mektepterdiń erki boıynsha júzege asyrylatyn bolady. Bıyldan bastap osy baǵytta zańnamany jetildirý uıǵarylýda.
Mınıstrlik muǵalimderdiń jalaqysyna qatysty normatıvti-quqyqtyq aktilerge engiziletin túzetýlerdi daıyndady jáne olar búgingi kúni memlekettik organdarǵa kelisilýge berildi. Memlekettik organdarmen kelisilgen jáne respýblıkalyq bıýdjettik komıssııamen qarastyrylǵan soń osy túzetýler Úkimetke bekitýge usynylatyn bolady. Jalpy, jýyrdaǵy 3 jylda muǵalimderdiń jalaqysyn ósirýge respýblıkalyq bıýdjeten 378 mlrd teńge qaralatyn bolady, onyń 67 mlrd-y osy jyly bólindi. Sonymen qatar muǵalimder úshin biliktilik deńgeıin esepke alatyn jańa qosymsha tóleý júıesi engizilmek. Sanattar ulttyq biliktilik testi arqyly beriledi jáne dáleldengen biliktilikke baılanysty muǵalimniń jalaqysy orta eseppen 20 paıyzdan 50 paıyzǵa deıin artady», dedi ol.
Raýan QAIDAR,
«Egemen Qazaqstan»
