Onda oblys ákimi Qumar Aqsaqalov tarıhı qujatta belgilengen mindetter boıynsha jergiliki jerlerde atqarylatyn jumystar týraly baıandap berdi.
«Joldaý jahandyq ónerkásiptik revolıýsııa kezeńindegi elimizdiń baǵytyn belgileıtin, aldaǵy josparyn aıqyndaıtyn negizgi qujat bolyp sanalady. Prezıdent onda Qazaqstannyń jetken jetistikterin saqtap, jańa belesterdi baǵyndyrýǵa baǵyttalǵan 10 negizgi tapsyrmany atady», dedi Qumar Irgebaıuly.
О́ńir basshysy iri zaýyttardy jańǵyrtý sharalary kútip turǵanyn aıtty. Bul oraıda «Maslo-Del» kompanııasynyń jańa sút zaýyty jáne «Áýlıe Gold Maınıng» altyn óndirý kesheniniń jańǵyrtý tájirıbeleri kópke úlgi.
Bıyl Qyzyljar aýdanynda 1 MVt qýaty bar bıogaz qondyrǵysy boı kóteredi. «Greencity KZ» JShS 35 MVt qýatqa teń bar jel elektr stansasyn salýǵa kiristi. Fınlıandııanyń «Kauko International» kompanııasymen qaldyqtardy óńdep, ony elektr energııasyna aınaldyrý jobasy boıynsha kelissózder júrgizilip jatyr.
Jyl aıaǵyna deıin 369 kılometr jol jóndeledi. Bul baǵytqa 10,5 mıllıard teńge qarastyrylǵan. «TransMotorsGrýpp» JShS Mamlıýt aýdanynda kóliktik-logıstıka ortalyǵyn ashýdy kózdep otyr. Onda júk jınaý, dámhana, qonaq úı, tehnıkalyq qyzmet kórsetý kesheni bolady. Petropavl qalasynyń bas josparyna sáıkes ınteraktıvti ınvestısııalyq kartalar men elektrondyq sáýlet ınternet jobalary iske asady.
Jıynda «Taıynsha Astyq» fırmasynyń dırektory Anatolıı Rafalskıı, daryndy balalarǵa mamandandyrylǵan «LORD» mektep-lıseıiniń dırektory Gúljan Jaqanova, Nazarbaev zııatkerlik mektebiniń dırektory Nurǵalı Elshibekov, «Esil» óńirlik damý ortalyǵynyń jetekshisi Rýslan Sháripov, Memlekettik qyzmet isteri jáne sybaılas jemqorlyqqa qarsy is-qımyl agenttiginiń oblys boıynsha departamentiniń basshysy Ǵalym Tursynbaev sóz sóılep, óz oılaryn ortaǵa saldy.
О́mir ESQALI,
«Egemen Qazaqstan»
