Qala kóshelerine drenaj ornatý problemasyn talqylaýǵa qazaqstandyq belgili ǵalymdar men tájirıbeli mamandar qatysty. Ulttyq ǵylym akademııasynyń akademıgi, 2000 jyldary Atyraý oblysynyń ákimi bolǵan Serikbaı Dáýkeev jeke ǵımarattar men nysandardan shyǵatyn jergilikti júıeler qosylatyn ortalyqtandyrylǵan magıstraldy drenaj júıesin engizýdi usyndy.
- Sonymen birge kez kelgen jol tósemindegi sý magıstraldy drenaj júıesine quıylý úshin barlyq avtokólik joldaryna nóser kanalızasııasyn salý kerek, - dedi akademık Serikbaı Dáýkeev.
Geologııa-mınerologııa ǵylymdarynyń doktory Malıs Absametov drenaj sýyn qaladan shyǵarmaı, Atyraý qalasynyń aýmaǵynda saıabaqtary bar birneshe sý qoımalaryna bólip tastaýdy usyndy. Keıin ol jerlerdi turǵyndardyń kóktem-jaz mezgilderinde demalatyn orny etýge bolady. Ǵalymnyń sózinshe, drenaj sýy tógiletin sý qoımalarynyń qurylysy Eýropanyń birneshe elderinde qoldanysqa ıe.
Atyraý oblysynyń ákimi Nurlan Noǵaev barlyq usynylǵan jobalardy tyńdap, oblystyń barlyq aýdandaryna jer bederine, geologııalyq ornalasý jaǵdaıyna, jer asty sýlarynyń deńgeıine qaraı jeke tásil qoldaný kerektigin aıtty.
-Osy faktorlardyń bári esepke alynyp, jaqsy usynystar berýlerińiz kerek. Biz óz kezegimizde áriptestikke ázirmiz, ǵylym ókilderi, tájirıbeli maman retinde osy máseleni sheshý joldaryn berińizder. Atyraý oblysy men oblys ortalyǵy úshin qandaı drenaj júıesi mańyzdy, utymdy sheshimdi tańdaýymyz kerek, - dedi Nurlan Noǵaev.
Baqytgúl BABASh,
"Egemen Qazaqstan"
