Fılmdi rejısser-anımator - Turdybek Maıdan jáne Tilek Tóleýǵazy jasap shyqqan.
Eki jyl kóleminde jasalǵan bul fılmde 40-qa jýyq kınematografııanyń osy janrynda eńbek etip júrgen otandyq mamandar istegen. Uzaqtyǵy 65 mınýt quraıtyn mýltfılm 2D jáne 3D formatynda jasalǵan jáne ár sekýndynda 24-25 kadr sýret salynǵan. Keıipkerlerdi dybystaýǵa Erjan Jarylqasynuly, Janat Tynybaev, Samat Qordabaı, Tólebaev Erǵalı Dúısenuly, Alma Ádilqyzy esimdi teatr jáne kıno akterleri qatysqan.
"Biz osy "Muzbalaqty" jasaýdan buryn "Tastúlek" atty qysqa metrli anımasııalyq fılmdi aıaqtaǵan kezimiz, "Qazaqfılmge" Baqyt Ǵafýuly basshy bolyp kelgen bolatyn. Ol kisi anımasııa bólimine kelip bizdiń "Tastúlek" anımasııalyq fılmimizdi kórip, unatyp, kóńilinen ótkennen keıin, osy fılmdi ary qaraı tolyqmetrajdy etip jasaýdy tapsyryp, qoldaıtynyn aıtty. Sodan bastap osy taqyryp negizinde jańa tolyqmetrajdy "Muzbalaq" mýltfılminiń ssenarıyn jazdyq, jańa keıipkerlerdi qostyq jáne ekshn janrynda túsiremiz dep sheshtik. Mádenıet jáne sport mınıstrliginiń qoldaýymen osy mýltfılmdi jasap shyqtyq", - dedi Tilek Tóleýǵazy.
Avtorlar "Muzbalaq" atty anımasııalyq fılmi arqyly tarıh qoınaýyna enip, joǵalyp bara jatqan, qazaqtyń ǵasyrlar boıy qalyptasqan saıatshylyq mádenıetin kórsetý arqyly, adammen búrkit arasyndaǵy senim negizine quralǵan dostyqty jas urpaq sanasyna sińirýdi kózdeıdi. "Bes jasar búrkitti qazaq Muzbalaq deıdi. Qazaq bul tákappar qusqa jas ereksheligine qaraı at qoıady. Biz ańǵa shyqpasaq ta, ańshylardyń áńgimesin tyńdap óstik. Úlkendermen erip, ańdy qalaı tuzaqqa túsirýge bolatynyn da shet jaǵalap kózimizben kórdik. Qyrandy qalaı qondyryp, tuǵyryna qalaı otyrǵyzý qajettigin, atty qalaı baptap, qalaı jaratatynyn, qusty qalaı qolǵa ustaýǵa bolatynyn bizdeı eshkim bilmesi anyq", - dedi Turdybek Maıdan.
Eske salaıyq, kınostýdııa 2017 jyly eki tolyqmetrli anımasııalyq fılmdi óndirdi. Sonyń biri "Muzbalaq" bolsa, ekinshisi rejısser Adaı Ábildanyń tarıhı tulǵa, qolbasshy Kúltegin týraly kartınasy. Atalǵan fılmder tolyqqandy aıaqtalǵan jáne prokaty men tusaýkeseri ústimizdegi jyldyń kóktemine josparlanǵan.
