Ol aýyldy otqa orap, qarsy kelgendi jalmap kele jatqanda, bir qyran búrkit balapanyn qorǵap, onymen aıqasqa túsedi. Aspan qojasynyń tegeýrinine tótep bere almaǵan ábjylan aqyry jer astyna qashyp, tyǵylýǵa májbúr bolady. Al qyran otqa oranǵan uıadan balapanyn aman alyp shyǵyp, qanat talyp jetetin qııasyna samǵaı jóneledi. Adam jutyp dánikken ábjylan kún tutylyp, óziniń aıdaharǵa aınalar sátin asyǵa kútedi...
Bul – Sh.Aımanov atyndaǵy «Qazaqfılm» kınostýdııasy jasap shyǵarǵan «Muzbalaq» atty tolyqmetrajdy kórkem anımasııalyq fılmniń qysqasha mazmuny. Keshe kınostýdııa osy fılmniń treılerin jarııalady. Búrkit pen adamnyń dostyǵyn baıandaıtyn bul mýltfılm Mádenıet jáne sport mınıstrliginiń tapsyrysy boıynsha túsirilgen. Fılm rejısser-anımator – Turdybek Maıdan jáne Tilek Tóleýǵazynyń birlesken shyǵarmashylyq eńbeginiń jemisi.
Eki jylǵa sozylǵan bul fılmdi jasap shyǵarýǵa kınematografııanyń osy janrynda eńbek etip júrgen 40-qa jýyq otandyq maman tartylǵan. Uzaqtyǵy 65 mınýtqa sozylatyn mýltfılm 2D jáne 3D formatynda jasalǵan jáne ár sekýndynda 24-25 kadr sýret salynǵan. Keıipkerlerdi dybystaýǵa Erjan Jarylqasynuly, Janat Tynybaev, Samat Qordabaı, Erǵalı Tólebaev, Alma Ádilqyzy esimdi teatr jáne kıno akterleri qatysqan.
– Biz osy «Muzbalaqtan» buryn «Tastúlek» atty qysqametrajdy anımasııalyq fılmdi aıaqtaǵan edik. «Qazaqfılmge» Baqyt Ǵafýuly basshy bolyp keldi. Ol kisi anımasııa bólimine kelip bizdiń «Tastúlek» anımasııalyq fılmimizdi kórip, unatqanyn, múmkin bolsa, fılmdi ári qaraı tolyqmetrajdy etip jasaý týraly usynysyn bildirdi. Basshynyń qoldaýymen jańa tolyqmetrajdy «Muzbalaq» mýltfılminiń ssenarııin jazýǵa kiristik, jańa keıipkerlerdi qostyq jáne ekshn janrynda túsiremiz dep sheshtik, – deıdi Tilek Tóleýǵazy.
Avtorlar «Muzbalaq» anımasııalyq fılmi arqyly tarıh qoınaýyna enip, joǵalyp bara jatqan, qazaqtyń ǵasyrlar boıy qalyptasqan saıatshylyq mádenıetin kórsetý arqyly jas urpaqtyń sanasyna ózara senim men dostyq uǵymyn sińirýdi kózdeıdi.
– Bes jasar búrkitti qazaq Muzbalaq deıdi. Qazaq bul tákappar qusqa jas ereksheligine qaraı at qoıady. Biz ańǵa shyqpasaq ta, bala kúnimizden ańshylardyń áńgimesin tyńdap óstik. Úlkenderge erip, ańnyń qalaı tuzaqqa túsetininiń shet jaǵasyn kózimizben kórdik. Qazaq halqy qyrandy qolǵa úıretýdiń sheberi, baby kelisken kezinen bastap ańǵa qalaı salatynyn dál qazaqtaı meńgergen halyq neken-saıaq shyǵar,– deıdi áriptesiniń oıyn tolyqtyrǵan Turdybek Maıdan.
«Qazaqfılm» kınostýdııasy 2017 jyly eki tolyqmetrajdy anımasııalyq fılm óndirdi. Sonyń biri «Muzbalaq» bolsa, ekinshisi rejısser Adaı Ábildanyń tarıhı tulǵa, qolbasshy Kúltegin týraly kartınasy. Atalǵan fılmder tolyqqandy aıaqtalǵan jáne prokaty men tusaýkeseri ústimizdegi jyldyń kóktemine josparlanǵan.
Aıgúl AHANBAIQYZY,
«Egemen Qazaqstan»
ALMATY
