2017 jyly elordada týylǵan 405 sábıge Aızere esimi berilipti. 354 ret berilgen Aılın esimi ekinshi orynda. Úzdik úshtikti Ámına esimi túıindeıdi. 353 ata-ana óz balasyna osy esimdi bergen. Aıarý, Aısha, Raıana, Aıala, Káýsar, Darııa, Ádııa, Injý, Aıym jáne Tomırıs esimderi de ótken jyly qyz balalarǵa qoıylǵan esimderdiń arasynda aldyńǵy qatarda tur.
Al uldar arasynda jıi qoıylǵan esimderdiń úshtigine Álıhan, Ámir jáne Álı esimderi kiredi. Elordada 12 aı ishinde bul esimder 328, 255 jáne 222 balaǵa berildi. Sondaı-aq, astanalyq ata-analar ózderiniń ul balalary úshin jıi tańdaǵan esimderdiń arasynda Aısultan, Sanjar, Erasyl, Arlan, Arsen, Nurıslam, Alan, Mansur, Ramazan, Mıras jáne Álınur esimderi de kezdesedi.
Balalarǵa elde bolyp jatqan oqıǵalarǵa baılanysty esim qoıý dástúri de ózgergen joq. Halyqaralyq EKSPO kórmesin ótkizý kezinde «Esil» aýdanynyń AHAT bólimshesinde ul balaǵa qoıylǵan Bádibekspo esimi tirkeldi.
«Esil», «Saryarqa» jáne «Almaty» aýdandarynyń AHAT bólimsheleri bergen málimetterge sáıkes, elordada 2017 jyly Astanada dúnıege 34 087 sábı kelgen.
