Ońtústik Koreıanyń Penchang qalasynda 9-25 aqpan aralyǵynda XXIII qysqy Olımpıada oıyndarynyń jalaýy jelbireıtini aıan. Dúbirli saıysqa oraı, seısenbi kúni ońtústik shaharda Búkiálemdik boks akademııasynda QR UOK, QR Mádenıet jáne sport mınıstrligi men quzyrly mekemelerdiń qatysýymen sportshylarymyzdy resmı túrde shyǵaryp salý rásimi ótti.
Qazirgi tańda Qazaqstan sportshylary qystyq sporttyń birneshe túrinen 49 lısenzııa utyp aldy. Olardyń qatarynda medalǵa degen úmitkerler de az emes. Elsııar Qanaǵatovtyń aıtýynsha olar frıstaılshylar Dmıtrıı Reıxard, Iýlııa Galysheva, Janbota Aldabergenova, mánerlep syrǵanaýshy Denıs Ten, shańǵyshy Alekseı Poltoranın syndy sańlaqtar.
– Sportshylardyń daıyndyǵy oıdaǵydaı. QR UOK, federasııalardyń jáne QR MSM tarapynan qoldaý kórsetilýde. Birneshe kúnde lısenzııalarymyzdyń sany anyq belgili bolady. Sportshylarymyzǵa jeńis tileımiz! – dedi QR Mádenıet jáne sport mınıstrligi Sport jáne dene shynyqtyrý isteri komıtetiniń tóraǵasy Elsııar Qanaǵatov.
Al Penchang qalasyndaǵy qysqy Olımpıada oıyndary eki klasterde ornalasqan 12 sporttyq nysanynda ótkiziledi. Penchang taýly klasterinde shańǵy sportynan jarystar ótse, jaǵajaıdaǵy Kannyń klasterinde konkı sportynyń sheberleri ózara myqtyny anyqtaıtyn bolady. Qazaqstan sportshylary Ońtústik Koreıaǵa birinshi aqpannan bastap attana bastaıdy.
– Osy tartysty dodaǵa daıyndyq qarqyndy túrde ótýde. О́zimdi jaqsy jaǵymnan kórsetip, bir nátıjege qol jetkizsem deımin. Bizdiń sport túrinen qazir 3 lısenzııa bar. Menen bólek alǵashqy ret Olımpıadada Aqmarjan Kalmurzaeva men Marjan Aqjigit óner kórsetedi. Tórtinshi lısenzııany Jibek Arapbaeva jeńip alady dep oılaımyz. Bul men úshin ekinshi Olımpıada. Qobaljyp júrmin, óıtkeni maǵan senim artýshylar kóp, 2014 jyly alǵash barǵanymda qazirgideı jaýapkershilik bolmaǵan edi, – dedi BAQ ókilderimen bergen suhbatynda frıstaıl-akrobatshy Janbota Aldabergenova.
Saltanatty shara barysynda QR UOK prezıdenti Tımýr Qulybaev pen QR mádenıet jáne sport vıse-mınıstri Sáken Musaıbekov sportshylarymyzǵa jeńis tilep, attandyrdy. El namysyn qorǵaıtyn sportshylar óz alǵystaryn bildirip, el úmitin aqtaýǵa tyrysamyz desti.
Aınash ESALI,
«Egemen Qazaqstan»
ALMATY
