Oblystyq Tótenshe jaǵdaılar departamenti baspasóz qyzmetiniń taratqan málimetterine súıensek, Almatydan shyǵyp, Zaısandy betke alǵan avtobýs Aıagózge 40 shaqyrym qalǵanda isten shyǵyp, toqtaǵan eken.
«Saǵat 10 shamasynda aýdandyq ishki ister bólimi kezekshisinen jolda 27 jolaýshy jáne 2 júrgizýshi mingen avtobýstyń buzylyp, jolda qalǵany týraly qońyraý tústi. Jergilikti atqarýshy organdarmen birlese otyryp avtobýstaǵy jolaýshylarǵa arnaıy oryn daıyndadyq. Biz barǵansha sol mańda ketip bara jatqan avtobýs jolaýshylardy jaqyn jerdegi dámhanalardyń birine jetkizip salypty. Eki júrgizýshini AIB qyzmetkerleri alyp keldi. Avtobýstaǵy jolaýshylardyń barlyǵy - zaısandyqtar. Zardap shekken eshkim joq. Tún ortasynda jolaýshylar jergilikti qutqarýshylardyń kúshimen Aıagóz qalasyna jetkizilip, sport mektebiniń ǵımaratyna ornalastyryldy»,-deıdi Aıagóz aýdandyq TJ bóliminiń bas ınjeneri Darhan Nuǵametov.
Azamat QASYM,
«Egemen Qazaqstan»
Shyǵys Qazaqstan oblysy
