2018 jylǵy 22-24 qańtar kúnderi «UMC» korporatıvtik qorynyń Onkologııa jáne transplantologııa ulttyq ǵylymı ortalyǵynda AQSh-tan kelgen jetekshi halyqaralyq sarapshy, Mınnesota Medısına mektebiniń ýrologııa jáne onkoýrologııa departamentiniń dırektory, professor Badrınat Kanetıdiń qatysýymen «Qýyqaldy bezi, búırek jáne qýyq obyryn dıagnostıkalaý men emdeýdiń qazirgi zamanǵy tásilderi» taqyrybynda sheberlik-sabaǵy ótkizildi.
Professor Badrınat Konetı – erkekbezi jáne qýyq obyryn emdeý salasynda tanymal, bedeldi sarapshy. 120-dan astam ǵylymı maqalalar jarııalaǵan ol AQSh-tyń úzdik dárigerleriniń tizimine kiredi.
Sheberlik-sabaǵy aıasynda «UMC» korporatıvtik qorynyń Onkologııa jáne transplantologııa ulttyq ǵylymı ortalyǵynyń ýrolog dárigerlerimen birlesip, 7 operasııa jasady jáne qýyqaldy bezi, búırek jáne qýyq obyryn emdeýdiń qazirgi zamanǵy tásilderi, ondaı naýqastardy ári qaraı ońaltý máseleleri boıynsha tájirıbelik keńester berdi.
Birinshi kúni atalǵan ortalyqtyń ýrologııalyq bóliminde erkekbezi obyry kezinde qoldanylatyn aımaqtyq lımfodısseksııasymen júıkeni saqtaıtyn radıkaldy prostaektomııa otasy jasaldy. Bul naýqastyń erkektik qaýqaryna áser etpeı, ómir sapasyn jaqsartýǵa múmkindik beredi. Professor Badrınat Konetı joǵary bilikti operasııalyq tehnıkasyn jáne ony jasaýdyń biregeı tásilin kórsetti. Mundaı tájirıbe elimizdiń emdeý mekemelerinde bolashaqta osyndaı tehnologııalardy engizýdi jeńildetedi.
Sondaı-aq, búırek obyry kezinde ishastar arqyly aǵzalardy saqtaı otyryp atqarylatyn operasııa jasady. Mundaı tásil operasııa kezinde týyndaýy múmkin jaraqattardy azaıtyp, naýqasty ońaltý merzimin jedeldetedi. Jáne semınardyń sońynda professor Konetı 20 jyldan beri kishi dáretke barýda qınalyp júrgen naýqastyń nesep shyǵarý júıesin qalpyna keltirý operasııa jasady.
