«Qazmedıa» ortalyǵynda ótken jıynda Aqparat jáne kommýnıkasııalar mınıstri Dáýren Abaev ótken jyly ártúrli janrdaǵy, túrli taqyrypty qamtıtyn 40 serıal kórermen nazaryna usynylǵanyn atap ótti.
«О́zderińiz jaqsy bilesizder, qazir biz otandyq serıaldardy damytýǵa barynsha kóńil aýdaryp otyrmyz. Memleket basshysynyń tikeleı tapsyrmasy boıynsha, halqymyzdyń salt-dástúrin, tarıhy men erekshe qundylyqtaryn nasıhattaıtyn teleónimderge basa nazar aýdaryp kelemiz.
Máselen biz ótken jyly ártúrli janrdaǵy, túrli taqyrypty qamtıtyn 40 serıaldy kórermen nazaryna usyndyq. Otandyq telehıkaıalardy túsirýdi tek qana memlekettik arnalarǵa emes, kommersııalyq kanaldarǵa da tapsyrǵan bolatynbyz. Janrlar jan-jaqty ári ártúrli jastaǵy aýdıtorııaǵa arnalǵandyqtan bul jumysty jaýapty mamandarǵa tabystadyq dep oılaımyn. Bul serıaldardyń birneshe baǵyty boldy. Máselen, qoǵamnyń áleýmettik tustary, otbasylyq qundylyqtar men bereke-birlikti nasıhattap, halqymyzdyń baı tarıhy men dástúrin de kórsetýge tyrystyq. Árıne kórermenniń kózqarasy ártúrli bolady. Sondyqtan serıaldardyń reıtıngi de birden artyp ketýi múmkin emes. Eń bastysy, osy jumystar shyǵarmashylyq toptardyń kásibı deńgeıiniń ósýine yqpal etedi. Biz oǵan senemiz. Qurmetti kórermenderimizdiń, zııaly ortanyń pikirlerin bilip otyrmyz. Ekrandy sheteldik serıaldar jaýlap aldy deıtinder de bar. Sondyqtan biz aldymyzǵa aýqymdy strategııalyq maqsat qoıdyq. Bul maqsatymyz – sapaly otandyq telefılmderdiń sanyn arttyrý, kórermen talǵamyna saı, jaqsy serıaldar túsirý. Sondyqtan da bul jumysty jalǵastyra beretin bolamyz», dedi D.Abaev.
Sonymen qatar mınıstr ótken jyly 131 áleýmettik beınerolık túsirilgenin jáne bul Qazaqstan telearnasynyń tarıhy úshin rekordtyq kórsetkish ekenin jetkizdi.
«Aqparattyq tehnologııalar kúnnen-kúnge damyp jatqan zamanda biz ata saltymyzdy saqtap qalýǵa, efırde kórsetiletin dúnıelerdiń sapasyn arttyrýǵa úlken nazar aýdarýymyz qajet. Halqymyz «Eldik murat – eń bıik murat» degen qanatty sózdi beker aıtpaǵan. Sonymen ótken jyly «Qazaqstan» telearnasy 15 serıal, «Habar» 13 serıal, jeke telearnalar ártúrli janrlar men túrli taqyrypty qamtıtyn 12 ónim shyǵardy», dedi mınıstr.
Jıynǵa qatysqan «Habar» agenttigi» AQ basqarma tóraǵasynyń orynbasary Rınat Kertaev «Habar» arnasynda shyǵatyn serıaldardyń 95 paıyzy qazaq tilinde ekenin atap ótti.
«О́ıtkeni bizde otandyq ónimge, onyń ishinde qazaq tilindegi ónimge degen suranys joǵary. Sol sebepti biz kópshilik kórermenniń qazaqtildi azamattar ekenin eskere otyryp, qazaqtildi aýdıtorııanyń qatary artyp kele jatqanyn aldyńǵy orynǵa shyǵara otyryp, memlekettik tildegi ónimdi kóptep shyǵaramyz. Buryndary serıaldar az túsiriletin kezde bir jylǵa arnalyp josparlanyp túsirilgen serıaldardy biz sol jyldyń ishinde túsirip, kórsetip bitiretinbiz. Al sońǵy jyldary Aqparat jáne kommýnıkasııalar mınıstrliginiń serıal óndirisin qoldaýy, serıaldardy qarjylandyrýdy arttyrýy arqasynda byltyr shyqqan serıaldardyń ishinde áli de bolsa qańtar, aqpan aılarynda efırge shyǵarýǵa josparlanyp otyrǵan dúnıeler bar. Biraq barlyq serıaldar óndiris boıynsha josparlanǵan merzimde túsirilip, tapsyrylyp úlgerdi. Otandyq serıaldardyń túsirilýi telearna úshin de úlken kómek. О́ıtkeni, telearnada eki maýsym bar. Olar: kóktemgi jáne kúzgi maýsym. Sol maýsymdardyń ortasyndaǵy úzilisterdi sezdirmeı, kórermenniń otandyq serıaldardy jyl boıy kórýine jaqsy múmkindik berilip otyr degen oıdamyz», dedi ol.
Al «Astana» telearnasynyń bas dırektory Lázzat Tanysbaı negizinen serıaldardyń tili ol arnanyń baǵytyna, aýdıtorııasyna baılanysty deıdi. Sonymen qatar L.Tanysbaı «Astana» arnasy aýdıtorııasynyń 87 paıyzy qazaq tilinde bolǵandyqtan, serıaldar tek qazaq tilinde túsiriletinin tilge tıek etti.
«QAZAQSTAN» RTRK» AQ basqarma tóraǵasy Erlan Qarın Ulttyq arna túsirgen «Tar zaman» teleserıalyna toqtalyp, keńinen aqparat berdi.
«Tar zaman» serıaly HH ǵasyrdyń basyndaǵy túrli tarıhı dramalyq oqıǵalarǵa arnalǵan týyndy. Bul aýqymdy joba boldy. Biz oǵan muqııat kirisip, uzaq daıyndadyq. Tursyn Jurtbaı, Berik Ábdiǵalıuly bastaǵan arnaıy keńesshiler toby quryldy. Berik Ábdiǵalıuly jobanyń basynan aıaǵyna deıin ózi keńesshi boldy. Biz onyń ssenarııin muqııat zerttep, qarap, oınaıtyn akterlerdi de búkil respýblıka boıynsha iriktedik. Serıal birneshe jerde túsirildi. Naqtyraq aıtsaq, Almatyda, Taldyqorǵanda, Tarazda, Merkide, Pavlodarda, Baıanaýylda jáne Orynborda túsirilim jumystary júrgizildi. Bul serıalda 37 tarıhı keıipker sýrettelgen. Negizgi keıipkerleri – Alash qaıratkerleri. Atalǵan týyndy kórermen nazaryna naýryz aıynda usynylady», dedi Erlan Qarın.
Raýan QAIDAR,
«Egemen Qazaqstan»
Sýretti túsirgen
Erlan OMAR,
«Egemen Qazaqstan»
