Is-sharaǵa Senattyń Halyqaralyq qatynastar, qorǵanys jáne qaýipsizdik komıtetiniń tóraǵasy Darıǵa Nazarbaeva jáne Talǵat Musabaev, Darhan Káletaev syndy komıtettiń birqatar ókilderi qatysty.
Halyq qalaýlylary zamanaýı oqý ornyndaǵy kafedralardaǵy zerthanalardy aralady. Qazirgi tańda bilim ordasynda oqytýdyń jańa tásilderi men úlgileri júzege asyp jatyr. Máselen jańa zerthana grafıkalyq, mátindik jáne mýltımedıalyq aqparatpen jedel almasýǵa, jumys kartasyn júrgizip, áskerı qurylymdardy basqarý jóninde sheshim qabyldaýǵa múmkindik beredi.
Sonymen qatar depýtattar ýnıversıtettegi kitaphana qorymen tanysty. Onda áskerı salalardyń túr-túrine arnalǵan zamanaýı álemdik monografııalar, ǵylymı maqalalar, oqý quraldary bar. Bilim ordasynyń basshylyǵy kitaphananyń jyl saıyn tolyǵyp, jańaryp otyratynyn aıtady.
«Bizdiń Qarýly Kúshterimiz – jańa qarý-jaraqpen qamtamasyz etilgen zamanaýı ásker. Salaǵa sıfrly júıe men jańa tehnologııany engizýimiz kerek. Búginde áskerdi sıfrlandyrýdyń mańyzy zor. Elimiz bul jolǵa endi túsip keledi, áıtse de qazirdiń ózinde kókjıegimiz keń ekeni baıqalady. Al bul ýnıversıtet zaman talabyna saı bilim beredi», dedi Senat depýtaty Talǵat Musabaev.
Ýnıversıtet basshylyǵynyń aıtýynsha, oqý ornynda tálim alatyn stýdentterge barlyq jaǵdaı jasalǵan. Olardy zamanaýı bilimmen qamtamasyz etý úshin aǵylshyn tili kýrsy da uıymdastyrylypty. Bilim ordasynda magıstratýra, doktorantýra deńgeıin alýǵa múmkindik bar.
Senat depýtattary áskerı ǵylymı-zertteý ortalyǵynyń jumysymen de tanysyp, elimizdiń qorǵanys-ónerkásiptik keshenin ázirleý barysyn baqylap qaıtty. Shara sońynda komıtet tóraǵasy D.Nazarbaeva Qurmet kitabyna óz tilegin qaldyrdy.
Abaı ASANKELDIULY,
«Egemen Qazaqstan»
