Bul iste eń aldymen, qoljetimdi kottedjder men az qabatty turǵyn úıler salýǵa basymdyq berildi. Kóp keshikpeı ótken jyldyń naýryz aıynda qanatqaqty sáýlet jobalary boıynsha qurylys jumystary bastalyp ta ketken edi. Buǵan qosa baǵdarlama aıasynda toǵyz qabatty turǵyn úıler salý isi de josparǵa engizildi. Az ýaqyttyń ishinde «Nurly jer» turǵyn úı qurylysyna qatysty aımaqta aıqyndalǵan joba Úkimet tarapynan qoldaý tapty. Arada eki-úsh aı ótkende Aqtóbe oblysy tutastaı elimizde órken jaıa bastaǵan «Nurly jer» memlekettik baǵdarlamasynyń basty úılestirýshi býynyna aınala bastady. Osy bastamamen oń tájirıbeni kórý, úlgi alý úshin elimizdiń ózge óńirlerinen arnaıy delegasııalardyń kelýi aıtylǵan tujyrymnyń basty dáleli.
Endigi jerde sózimiz jalań bolmas úshin Aqtóbe oblystyq qurylys, sáýlet jáne qala qurylysy basqarmasynan alynǵan keıbir derekterge súıeneıik. О́tken jyly «Nurly jer» baǵdarlamasy sheńberinde barlyq qarjylandyrý kózderi esebinen 650 myń sharshy metr turǵyn úıdi paıdalanýǵa berý josparlanǵan eken. Bul meje 792,3 myń sharshy metr kóleminde oryndalǵan. Iаǵnı aldyńǵy jyldyń osy kezeńimen salystyrǵanda 128,5 paıyzdy quraıdy. Oblys ortalyǵynyń «Nur Aqtóbe» dep atalǵan shaǵyn turǵyn úı aýdanynda 2330 birliktegi derbes baspana salynyp, paıdalanýǵa berildi. Onyń 194-i kottedj bolsa, 858-i úsh qabatty turǵyn úı. Al 1278 páterden turatyn baspanalar toǵyz qabatty úılerdiń enshisine kiredi.
Aqtóbe óńiriniń qurysh qoldy qurylysshylary bul isti Qazaqstannyń turǵyn úı qurylys jınaq banki men birge iske asyrý ústinde, jańa baspananyń kiltine ıe bolyp úlgergenderdiń basym bóligi atalǵan banktiń salymshylary. Olardyń qatarynda áleýmettik sala men bıýdjet qyzmetkerleri, az qamtylǵan otbasylar bar. Solardyń biri jas otbasy ıesi, úsh balanyń ákesi, Keńqııaq kenishinde vahtalyq jumys isteıtin bilikti maman Baýyrjan Jumabaev 3 bólmeli páterge ıe boldy. Zaıybym Aınur men balalarymnyń qýanyshynda shek joq. Bul úshin biz úsh jyl boıy qarjy jınaqtadyq. Ásirese, bizdi perzentterimizdiń sabaq ázirleý úshin óz bólmesi bolatyny súısindiredi, deıdi ol.
Al úsh qabatty úıden 2 bólmeli páterdiń kiltin alǵan 12 jastaǵy qyzyn tárbıelep otyrǵan qala turǵyny Irına Kasıanova ózine ózge aýmaq emes, naqty osy «Nur Aqtóbeden» baspana buıyrýy jarty baqyty dep esepteıdi. Onyń aıtýynsha, atalǵan jańa turǵyn úı aýdanynyń ınfraqurylymy óte jaqsy. Ári bul jer ekologııalyq turǵydan óte taza aýmaq. Eger jalqydan jalpyǵa kósher bolsa, «Turǵynúıqurylysjınaqbanki» AQ Aqtóbe fılıalynan alynǵan derekter boıynsha búginde nysandardy jappaı paıdalanýǵa berý úrdisteri ótkizilýde. Ol úshin salymshylar men bank fılıaly arasyndaǵy satyp alý, satý, páterlerdi bólý jónindegi qat-qabat ister júrgizilýde.
Bıyl oblysta «Nurly jer» baǵdarlamasy aıasynda barlyq qarjylandyrý kózderi esebinen 850 myń sharshy metr turǵyn úıdi paıdalanýǵa berý kózdelgen. Bul shamamen 8 myń páter. Sóz joq, salystyrmaly túrde alǵanda, bul – óńirler arasyndaǵy bıik kórsetkish. Buǵan qol jetkizý úshin óńirde «Báıterek Development» AQ arqyly jergilikti atqarýshy organdardyń qundy qaǵazdaryn paıdalaný qarastyrylǵan. Munyń ózi nesıelik turǵyn úıler qurylysyna tán basty erekshelikterdiń biri bolmaq. Ári Aqtóbe qalasy men oblys aýdandarynda jaldamaly turǵyn úıler men satyp alý quqyǵynsyz beriletin jaldamaly baspanalar úlesin odan ári ulǵaıtý qarastyrylǵan. Oǵan qosa memlekettik emes kásiporyndar qarajatyn da «Nurly jerdiń» esebine engizý belgilengen. Onyń qataryn negizinen kommersııalyq turǵyn úıler quraıdy. Sondaı-aq oblysta turǵyndardyń óz qarajattary esebinen turǵyzylatyn jeke turǵyn úıler úlesi de jyl saıyn ósip keledi. Onyń kólemi 317 myń sharshy metrdi quraıdy. Bul shamamen 2 myńnan astam úı degen sóz.
Eger «Nurly jer» arqyly turǵyzylǵan qurylys aýdandarynda turǵyndardyń áleýmettik-turmystyq qajettilikterin óteıtin nysandar salynbasa, atalǵan baǵdarlama jartykesh kúıinde qalyp qoıar edi. Joq, olaı emes. О́ńirde bul turǵyda keshendi kózqaras qalyptasqan. Soǵan sáıkes jańa aýdanda 900 oryndyq orta mektep, balabaqsha men emhana ǵımarattary, halyqqa qyzmet kórsetý ortalyǵy jáne demalys saıabaqtary boı kótermek. Áleýmettik-turmystyq damýdyń jańa vektoryna saı «Nurly jer» baǵdarlamasy aıasynda Aqtóbede bıyl kem degende 100 myń adam turatyn qalashyq turǵyzylmaq.
Otandastarymyzdyń áleýmettik kóńil kúıiniń jaqsy bolýy birinshi kezekte jaıly baspanaǵa baılanysty. Derbes turǵyn úıge ıe bolý adamnyń mereıin ósirip, óz eline degen súıispenshiligi men eńbekke degen belsendiligin jáne ómirge degen qushtarlyǵyn arttyra alady. Jyl ótken saıyn egemen elimizde osyndaı múmkindikter jıilep keledi. Aqtóbe óńirinde atalǵan «Nurly jer» baǵdarlamasy aıasynda atqarylatyn aýqymdy jumystar odan ári jalǵasa bermek.
Temir QUSAIYN,
«Egemen Qazaqstan»
AQTО́BE
