Soltústik Qazaqstan oblysynyń turǵyndary Memleket basshysynyń jańa Joldaýyn yqylaspen qabyldady. Jurtshylyqpen kezdesý barysynda on negizgi mindet aıasynda óndiris úderisterin sandyq negizge kóshirý arqyly ındýstrııalandyrýdy óristetý, bilim berýdi jańa sıpatta damytý, qarjy sektoryn qaıta qalyptastyrý, kólik-logıstıka ınfraqurylymynyń tıimdiligin arttyrý, sybaılas jemqorlyqpen kúres jáne tıimdi memlekettik basqarý máseleleri sóz boldy.
Memlekettiń áleýmettik mindettemelerdi tolyq kólemde oryndaıtynyn, azamattarymyzdyń ál-aýqatyn odan ári arttyrý baǵytyndaǵy bastamalardy aýyl turǵyndary rızashylyqpen qabyldady. 1 qańtardan bastap yntymaqty zeınetaqy 8 paıyzǵa ósti, al shildeden bastap bazalyq zeınetaqy eńbek ótiline baılanysty ortasha alǵanda 1,8 ese ulǵaıady. Prezıdent odan basqa, I toptaǵy múgedek balalardyń kútimi úshin olardyń ata-analaryna 1 shildeden bastap memlekettik qosymsha járdemaqy engizýdi tapsyrdy. Bul óte qajetti qoldaý bolyp tabylady.
Mektep muǵalimderi de eńbekaqyny kóterý týraly sheshimdi qýana qabyldady. 1 qańtardan bastap mazmuny jańarǵan oqý materıaldaryna kóshetin muǵalimderdiń laýazymdyq eńbekaqysy 30 paıyzǵa ulǵaıady jáne qarqyndy damyp kele jatqan ekonomıkanyń arqasynda memlekette oǵan jetetin qarjy bar.
Aýyl eńbekkerleri Joldaýda agroónerkásip kesheni el ekonomıkasynyń draıveri retinde atap ótilgenin, bul sala aldyna úlken mindetter qoıylǵanyn atap ótti. Bul aýyl sharýashylyǵy ónimderiniń eksportyn ulǵaıtý úshin qajyrly eńbek etip jatqan jergilikti ónim óndirýshilerge qanat bitiredi.
Olga PEREPEChINA,
Parlament Senatynyń depýtaty
