Iаnnık Bokýınniń esimin estimegen jan neken-saıaq. Ol álemdegi eń aıtýly óner oshaqtarynda sheberlik sabaǵyn ótkizetin birden-bir baletmeıster. Olardyń qatarynda Koroldik shved baleti, Drezden memlekettik operasy (Germanııa), Fın ulttyq baleti, Lozannadaǵy Bejar baleti (Shveısarııa), Monte-Karlo baleti, Hıýston baleti (AQSh), Gonkong baleti, Reseıdiń Úlken teatry, t.b. bar.
Aıta keterligi, álemdik deńgeıdegi tanymal sheber óziniń horeografııalyq bilimin Parıj operasynyń balet mektebi men Parıj ulttyq konservatorııasynda alǵan bolatyn. Balet ónerinde ataq-dańqy órlegen azamat kezinde Bonn operasy baletiniń, Flandrııa Koroldik baletiniń, Rım opera teatrynyń, Berlındegi Nemis operasynyń jetekshi solısi bolyp óner kórsetse, keıin óziniń shyǵarmashylyq jolyn Vena Memlekettik operasy balet trýppasynyń tálimger ustazy retinde jalǵastyrǵan edi.
Bokýın ádisi delinetin sabaqtarǵa fransýz mektebiniń úlgisi turǵysynan qaraǵanda, kóptegen baǵyt-baǵdarlar enedi. О́mir belesterinde talaı tanymal taǵdyrlarmen, pedagog-mamandarmen jumys istegen maıtalman sonymen qatar sheberlik sabaqtarynda kásibı túrli jaraqattardy jeńý tájirıbelerimen bólisýdi eshqashan nazardan tys qaldyrǵan emes. Ataqty pedagog qozǵalys koordınasııasyna erekshe kóńil bóledi: olar balet tilinde «por de bra» dep atalady, ıaǵnı dene, qol men bastyń durys qalpyn saqtaý arqyly jasalatyn ádis. Sabaq ústinde ártister jyldam yrǵaqta jasalatyn «usaq» qımyl tehnıkasy, áýendilik, serpin, aıaqtardy durys qoıý boıynsha oqyp, úırenedi.
– Qazaqstanǵa kelgenime óte qýanyshtymyn, «Astana Operadaǵy» jumys – men úshin jańalyqqa toly, ári qyzyqty tájirıbege kezigýdemin. Munda kelgen sebebim, jaqynda balet trýppasynyń kórkemdik jetekshisi Altynaı Asylmuratovadan arnaıy shaqyrtý aldym. Astanalyq áriptesimniń óneri R.Petı men K.Makmıllan syndy áıgili horeograftardyń esimderimen tikeleı baılanysty, ol – tájirıbeli mamandarmen álemniń jetekshi teatrlarynda, túrli balet mektepterinde qyrýar tabysqa qol jetkizgen jan. Trýppa jetekshisi retinde oǵan qazaqstandyq ártisterdiń bul tájirıbeni qabyldaýy erekshe mańyzdy. Al «Astana Opera» teatry balet solısteriniń daıyndyǵyna kelsek, deńgeıleri óte jaqsy ári qımyldary ulpadaı jeńil, sergek, onyń ústine eń bastysy, olardyń kókirek kózderi ashyq, zerek, ózderine ázirge tyń dúnıe bolyp sanalatyn ádistememen qulshyna jumys isteýde. Ártister álemdik deńgeıdi baǵyndyrý jolynda ózderiniń kúsh-jigerlerin aıanyp qalyp jatqan joq jáne men olardyń alǵa qoıǵan osy maqsattaryna jetetinine senemin, – dedi Iаnnık Bokýın.
Aıtýly baletmeıster elimizdiń tarıhy men búgingi jarqyn bastamalaryna tańdanyp, Otanymyzdyń ordasy men «Astana Opera» teatry týraly shat-shadyman ráýishte pikir bildirdi.
– Sáni men sáýleti kelisken keremet teatrdy kórip qyzyǵasyń. Ásirese maǵan Mármár zalynyń kórkemdigi unady, foıeniń qabyrǵalaryn sándep turǵan Qazaqstan tabıǵatynyń kartınalary qandaı tamasha. «Astana Operanyń» úlken zaly aıryqsha áser qaldyrady, daıyndyq zaldary keń, balet edenderi sapaly – mundaı jaıt árbir teatrda kezdese bermeıdi, – dedi maestro qysqa da nusqa bergen suhbatynda.
Qarshyǵa KÚLEN
