Ortalyq mýzeı 2013 jyldan beri «Biz birgemiz!» stýdııasymen birlese otyryp «Mýzeı túni», «Naýryz boıaýlary», «Otbasymen mýzeıge!» jáne basqa da tartymdy jobalardy iske asyrdy.
Joba jetekshisi Dına Mertenova Shet tilderi ınstıtýtyn támamdaǵannan keıin birden kásipkerlikpen aınalysty. Degenmen ol óziniń sýretshi ekenin jan-tánimen árdaıym sezinetin jáne sýret ýchılıshesinde oqyǵan jyldaryn ystyq sezimmen jıi eske alatyn. Birshama jyl ótkende kenetten otbasy oǵan molbert, qylqalam men boıaýlar usynyp tosyn syı jasady. Sodan beri keskindeme óneri onyń ómirlik isine aınalǵan, sóıtip «Biz birgemiz!» atty kórkemsýret stýdııasyn ashty.
Ýkraınalyq sýretshi M.Skoblınskıımen kezdeskennen keıin Dına keskindemede tyń ári biregeı, adamǵa shabyt beretin, bastysy, kenepke boıaýdy saýsaqpen jaǵý, mashıtınmen jáne qylqalamdardy aralastyra otyryp sýret salý sııaqty nátıjeli tásil arqyly adam seziminiń san-alýandyǵyn kórsetýge bolatynyn baıqady.
«Alla prıma» ádisi 1-3 saǵat arasynda tolyqqandy sýret salýǵa múmkindik beretin ımpressıonıst sýretshilerdiń shyǵarmashylyǵynda turaqty ornyn tapty. Bul maıly boıaýmen áp-sátte sýret salyp shyǵýǵa múmkindik beretin tanymal tásil. Mundaı ádisti qoldanatyn sýretshi boıaý tolyq keýip bolǵansha sýretin salyp bitiredi.
Qazirgi kezde «Biz birgemiz!» stýdııasy ónerge nemquraıly qaramaıtyn, óz daryndarynyń túrli qyrlaryn shyńdaǵysy keletin túrli jastaǵy adamdardy biriktire aldy. Sebebi shyǵarmashylyq ushqynyn árbir adam boıynan tabýǵa bolady. Kenep betinde senimdi syrǵyǵan qylqalam qımylynan túrli jolaqtar, boıaýlar men beıneler paıda bolyp, sońynda tamasha bir kartınanyń dúnıege kelýin baqylaý da bir ǵanıbet. Kúni keshe ónerden alshaq júrgenińmen búgin ózińdi keskindeme ónerinde baıqap kórgen tipti de ǵanıbet.
Jobanyń maqsaty – maıly boıaýmen sýret salýdyń qyr-syryn úırete otyryp, adamnyń ózine degen senimin oıatý.
Kórmege túrli janrdaǵy — peızaj, natıýrmort, portret jáne batık ádisinde salynǵan 50 shyǵarma qoıyldy.
Sýret salýda akademııalyq bilimderi bolmaǵanymen, sýretti júregimen jáne kóńiliniń sıqyrly sáýlesi – daryn, shabyt jáne zor súıispenshilikpen salatyn jandar. О́nerge degen súıispenshilik bul óner ıelerin «Álem jaýyngerlerindeı» sezindiredi.
Saparbaı PARMANQUL,
«Egemen Qazaqstan»
ALMATY
