Osyǵan deıin qos Koreıa bir týdyń astynda shyǵatyny, hokkeıshileri bir quramada óner kórsetetini habarlanǵan. Búgin soltústiktiń 12 hokkeıshisi ońtústiktegi áriptesterine qosylyp, jattyǵýǵa kiristi.
Koreı Halyq Demokratııalyq Respýblıkasynyń (KHDR) qysqy Olımpıadaǵa qatysatyny bastapqyda belgisiz bolǵan. Alaıda, KHDR basshysy Kım Chen Yn jańajyldyq quttyqtaýynda Penchangtaǵy Oıyndarǵa qatysý máselesin qarastyryp jatqanyn málimdedi. Bul oıdy Ońtústik Koreıanyń prezıdenti Mýn Chje In jyly qabyldap, máseleni talqylaý úshin kelissóz ótkizýdi usyndy. Al kelissóz 9 qańtar kúni sátti aıaqtaldy. Qorytyndysy boıynsha Olımpıadanyń ashylýynda qos Koreıa bir týdyń astynda shyǵady.
Kelissóz boıynsha Olımpıada kezinde ár matchqa keminde úsh soltústikkorenıalyq hokkeıshi shyǵýy tıis. Ońtústik Koreıa hokkeıshileri bastapqyda buǵan narazylyq tanytqan. Oǵan negizgi sebeptiń biri – ońtústik sportshylarynyń oıyn praktıkasy azaıýy.
«Soltústik Koreıa hokkeıshilerin qatarymyzǵa qosý týraly kelissózder júrip jatyr. Bul bizge unamaı turǵany jasyryn emes. Sebebi Ońtústik Koreıa quramasynyń 23 oıynshysy Olımpıadaǵa joldama aldy. Olar osy jarysqa qatysý úshin baryn saldy. Endi ózge hokkeıshiler qatarymyzdy toltyrsa, qurama sapyndaǵy qyzdardyń birazy Olımpıadadan tys qalýy múmkin ǵoı. Sondyqtan qyzdarymyz osyǵan alańdap otyr», degen edi hokkeıden Ońtústik Koreıa áıelder quramasynyń jattyqtyrýshysy Sara Mıýrreı.
Degenmen Halyqaralyq Olımpıada komıteti Ońtústik Koreıanyń 23 hokkeıshisine KHDR-diń 12 sportshysyn qosý týraly usynysqa kelisimin berdi.
«Komandanyń saıası maqsatta qoldanylýy qıyn jaǵdaı. Biraq bul bizge ǵana emes, bárimizge mańyzdy», dedi Sara Mıýrreı.
Álemdik sarapshylar Soltústik Koreıanyń qysqy Olımpıadaǵa qatysýy halyqaralyq sanksııalardyń jumsarýyna ákelýi múmkin degen boljam jasap otyr.
