Aqtóbe – kólik-logıstıka ınfraqurylymyn damytýǵa óte yńǵaıly óńir. Eń bastysy, munda ony órge bastyrýdyń jańa múmkindikteri men paıdalanylmaǵan rezervteri bar. Aktıv jınalysy kezinde bul úshin birinshi kezekte jergilikti jáne respýblıkalyq mańyzy bar avtokólik joldaryna kúrdeli jóndeýler júrgizý qajettigi atap ótildi. Bıyl oblys aýmaǵynda Aqtóbe – Atyraý – Astrahan halyqaralyq avtomobıl jolynyń qurylysy qyzý qarqyn almaq. Sondaı-aq Shalqar – Yrǵyz avtojolyn kúrdeli jóndeýden ótkizýge, ári oblys ortalyǵyndaǵy aınalmaly aspaly kópirler qurylysyna baılanysty jańa sheshimder belgilenbek.
Joldaýda qoıylǵan besinshi mindetke baılanysty oblysta qurylys salasynda jáne turǵyn úı-kommýnaldyq sharýashylyq sektorynda da jańa ózgeristerdiń túndigi túrilmek. Sonyń ishinde «Nurly jer» baǵdarlamasyn júzege asyrýǵa oraı 870 myń sharshy metr baspana paıdalanýǵa berilmek.
Aqtóbe ınnovasııa men óndiristi damytý isinde jáne ınnovasııalyq qarajattar tartý turǵysynda respýblıka óńirleri arasynda kósh bastaýshy óńirlerdiń qatarynan oryn alady. Buǵan mysal retinde ótken jyly óńirge 437 mıllıard teńge ınvestısııalyq qarajat tartylǵanyn aıtsaq ta jetkilikti. Al bıylǵy meje – jarty trıllıon tenge kóleminde bolmaq.
Memleket basshysy Joldaýynyń bıylǵy basty ózegi adamı kapıtaldy damytý ekeni belgili. Osy oraıda oblysta bilim, densaýlyq saqtaý, mádenıet, sport, salamatty ómir saltyn ornyqtyrý máseleleri boıynsha jańa kókjıekter ashylmaq. Sonyń ishinde 2020 jylǵa deıin búldirshinderdi balabaqshamen 100 paıyzdyq deńgeıde qamtý jóninde naqty is-sharalar kesheni jasalǵan. Sondaı-aq ótken jyly oblysta 15 orta mektep úıiniń qurylysy aıaqtalyp, paıdalanýǵa berilse, bıyl 26 mektep ǵımaraty turǵyzylýda. Joldaýda qoıylǵan sıfrlandyrý men aqparattyq-anyqtamalyq júıeni bir izge keltirý úshin óńirde arnaıy jumys toby qurylǵan.
Árıne, aımaqta barlyq qoǵamdyq-turmystyq máselelerdiń sheshimi tabylǵan desek, shyndyqqa kóleńke túsirip alarmyz. Aıtalyq, oblys aýmaǵy ınternet júıesimen 100 paıyzǵa jýyq qamtylǵanymen, Oıyl, Yrǵyz, Shalqar, Temir sekildi shalǵaı aýdandarda onyń jyldamdyǵy tómen ekeni de ras. Kásiptik-tehnıkalyq bilim berý oryndarynyń tıimdiligin kóterý men ınformatıka salasyna qajetti mamandar ázirleý jáne dýaldy oqytý ádisin jetildirý isinde óz kezegin kútip turǵan ister de jetkilikti.
Erkin eldiń erteńi – búgingi búldirshinder men jetkinshekter. Kez kelgen qoǵam men memlekettiń izgiligi oǵan qanshalyqty deńgeıle qamqorlyq jasalǵanymen kórinbek. Osy turǵyda adamı kapıtaldyń jańa sapasyn aıqyndap bergen Prezıdenttiń bıylǵy Joldaýynyń orny aıyryqsha. Munda eldiń bolashaǵy jastarǵa qatysty mereıli mindetterdi dástúr sabaqtastyǵyna qosa, búgingi jańasha kózqaras jaǵdaıynda júzege asyrý joldary aıtylǵan. Qalaı degende de, búgingi jastar tárbıesiniń basty ózegi patrıottyq tárbıe, otanshyldyqqa úndeý, ónegelik salt-dástúrimizdi odan ári damytý bolyp qala bermek. Bul rette aktıvte sóılegen sózinde Aqtóbe oblysynyń ákimi B.Saparbaev bıylǵy jyl oblysta balalar jyly bolyp jarııalanǵanyn jetkizdi.
Túıip aıtqanda, aktıv jınalysynda Joldaýda qozǵalǵan mindetterge sáıkes óńiri áleýmettik-ekonomıkalyq turǵydan damytýdyń barlyq múmkindikteri jan-jaqty saralandy.
Temir QUSAIYN,
«Egemen Qazaqstan»
Aqtóbe
