Jalpy aýmaǵy 9 gektar jerdi alyp jatqan bazada munaı ónerkásibi quraldaryn jáne tehnologııalyq kommýnıkasııalardy jóndeý basqarmasynyń 300-den asa qyzmetkeri jumys isteıdi. Sondaı-aq atalǵan basqarmanyń 5 seh, 2 ýchaskesi osy nysanǵa ornalasýda. Mamandardyń aıtýynsha, mundaı iri nysan TMD elderindegi munaı-gaz sektorynda alǵash ret salynyp otyr.
– Elbasy N.Á.Nazarbaevtyń kúni keshe jarııalaǵan Joldaýyndaǵy 10 basymdyqtyń negizgisi de óndiristik salany jańǵyrtý baǵytynda boldy. О́tken jyl qorytyndysy boıynsha, ónerkásip óndirisiniń naqty kólem ındeksi 110,3%-dy qurady. Al «О́zenmunaıgaz» aksıonerlik qoǵamy 5013,1 myń tonna shıki munaı, qala kásiporyndary arqyly 281,7 mln tekshe metr tabıǵı gaz óndirdi. «О́zenmunaıgaz» aksıonerlik qoǵamy búginde 9000-daı munaıshyny jumyspen qamtyp, qalanyń áleýmettik-ekonomıkalyq damýyna ózindik úles qosyp otyr, – dedi Mańǵystaý oblysynyń ákimi E.Toǵjanov nysannyń ashylý saltanatynda.
О́tken jyly «О́zenmunaıgaz» aksıonerlik qoǵamynyń munaı óndirý kórsetkishi 5 mln 480 myń tonnany qurady. Kompanııamen oǵan qatysty mekemeler 20 307 adamdy jumyspen qamtyp otyr.
Qazirgi tańda Jańaózen qalasyndaǵy eń ózekti máselelerdiń biri – apatty jáne tozyǵy jetken úıler.
– Arnaıy komıssııanyń sheshimimen apatty dep tanylǵan úılerdiń turǵyndaryna páter berip, apatty úılerdi buzý jumystaryn júrgizý baǵytynda birneshe shara qolǵa alyndy. О́tken jyly bul maqsatta 431,9 mln teńgege 56 páter satyp alyndy jáne № 59 úıdiń turǵyndaryna páter kiltteri tabystalyp, tıisti qujattar rásimdelýde. Apatty jaǵdaıdaǵy №43 úıdiń turǵyndaryn tolyqtaı pátermen qamtamasyz etý úshin qosymsha 14 páter satyp alý qajet. Bul 284 mln teńge bólýdi qajet etedi. Sondaı-aq tozyǵy jetken 59 turǵyn úıdiń konstrýksııalaryn bekitip, qaýipti ýchaskelerin qalpyna keltirý sharalaryn bıýdjet qarjysynsyz, ózge mekemelerdiń kúshimen sheshý joldary da qarastyrylýda, – deıdi Jańaózen qalasynyń ákimi Ádilbek Daýylbaev.
Jumyssyzdyq pen aýyzsý máseleleri de Jańaózen qalasyndaǵy basty máselelerdiń biri. Qala boıynsha 1088 adam jumyssyzdyq esebinde tirkeýde tur. Qala jáne oǵan irgeles aýyldarda tirkeýde joq jumyssyz júrgen turǵyndardyń, otbasy jaǵdaıy tómen otbasylardyń naqty sanyn anyqtaý maqsatynda qala ákimdiginde jumysshy toby qurylyp, úılerdi aralaý jumystaryn bastaǵan.
Aýyzsýdyń tapshylyǵy qalada, ásirese jaz mezgilinde baıqalady. Jańaózen qalasyna táýligine «QazTransOıl» AQ-tan 20 myń tekshe metr, Túıesý, Saýysqan ken oryndarynan 7,5 myń tekshe metr, barlyǵy 27,5 myń tekshe metr sý beriledi, Edil sýy qalalyq sý tazartý ǵımaratynda tazartylady. Jańaózen qalasyndaǵy táýligine 30 myń tekshe metr sý tazartatyn jańa nysannyń qurylysy osy jyly aıaqtalmaq.
Jergilikti ákimdik qalada aýyzsý máselesin sheshýdiń jazǵy mezgilderde «QazTransOıl» AQ-pen beriletin Edil sýynyń kólemin táýligine 5 tekshe metrge, ıaǵnı 20 myń tekshe metrden 25 myń tekshe metrge deıin kóbeıtý jáne «О́zenmunaıgaz» AQ-tyń «Kendirli» aýmaǵyndaǵy teńiz sýyn tushytý zaýyty qurylysynyń jobasyn iske asyrý sekildi eki jolmen sheshýge bolatyndyǵyn aıtady.
Jańaózendik turǵyndar jeke kásibin bastaýǵa yntaly, ásirese jergilikti qoldaýǵa ıe «О́ńirlik «Nur kapıtal» baǵdarlamasy boıynsha kásipkerligin iske asyrýǵa bastamasy 1 mlrd teńgeniń ústinde nesıeni qamtıtyn 26 kásipker nıet bildirgen. Bul kásipkerler 500 jańa jumys ornyn quratyn bolady. Sondaı-aq qalanyń ındýstrııalyq aımaǵynda óndiris oryndaryn qurýǵa nıetti 36 kásipker shamamen 250 jańa jumys ornyn ashpaq.
Jańaózendegi jasalyp jatqan jumystarmen birge, jasalýy tıis jumystar da bar. Bostandyq pen Rahat shaǵyn aýdandarynda drenajdyq júıe salý, aýyl ishiniń avtokólik joldary máselesi, eldi mekenderge trotýarlar salý, kommýnaldyq mekemelerdiń qarjy-ekonomıkalyq jaǵdaıy sekildi máseleler óz sheshimin kútýde.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
