Qyzylorda oblysynyń ákimi Q.Kósherbaev bastaǵan aımaq delegasııasy Qytaı Halyq Respýblıkasyna jumys saparmen baryp, Beıjiń, Shanhaı jáne Shenchjen qalalaryndaǵy birqatar iri kompanııalardyń jumysymen tanysty. Baǵdarlama aıasynda iri ınvestısııalyq kompanııalardyń ókilderimen kezdesip, áriptestik jóninde kelissóz júrgizdi.
Atap aıtqanda, Qyzylorda oblysynyń ákimi kómir, kún jáne sý elektr stansııalarynyń qurylysymen aınalysatyn "CNEEC" («Qytaı ulttyq elektr ınjınırıng korporasııasy») basshylyǵymen kezdesti.
Kezdesý barysynda Qyzylordada sý jáne kún elektr stansııalaryn, qoqysty qaıta óńdeıtin zaýyt salý, sondaı-aq, «aqyldy qala» júıesin damytý máseleleri talqylandy.
«Bizdiń aımaǵymyz kún sáýlesiniń belsendiligi boıynsha kóshbasshy bolyp sanalady, ásirese, jaz mezgilinde úlken qýattylyqtaǵy kún elektr stansııasyn salý múmkindigi bar. Syrdarııa ózeninde qýattylyǵy 20-25 megavatt gıdroelektr stansııasyn salýǵa bolatyn «Aqlaq» gıdrotehnıkalyq qurylǵysy bar. Kelesi joba oblys ortalyǵyna baılanysty, munda bizge jyldyq qýattylyǵy 150-160 myń tonna qatty turmystyq qaldyqtardy qaıta óńdep, kádege jaratatyn zaýyt qajet. Osy joba bizge birden eki máseleni, ıaǵnı, qaldyqtardy óńdep qana qoımaı, birshama elektr qýatyn óndirýdi sheship berýi qajet, - dedi Q.Kósherbaev.
Kezdesý qorytyndysy boıynsha CNEEC jumys toby quryldy. Top ókilderi joabalardy meılinshe jyldam júzege asyrý maqsatynda taıaýda Qyzylorda oblysyna kelmek.
О́z kezeginde, CNEEC kompanııasynyń basshysy Chjen Chenszıýn «kezdesý tabysty boldy, qyzmetimiz arqyly Qazaqstan men Qytaıdyń áriptestik qarym-qatynasyn ári qaraı nyǵaıtý biz úshin úlken mártebe» dep atap ótti.
Sondaı-aq, aımaq basshysy álemdegi eń iri shyny ónimderin óndirýshi kásiporyndardyń biri - «China Triumph International Engineering Co., Ltd» basshylarymen kezdesti. Oblys ákimi Q.Kósherbaev jáne «Chaına Trıýmf» kompanııasynyń basshysy shyny zaýyty jobasynyń, ásirese, onyń ekinshi kezeńi – gadjetterge arnalǵan asa juqa áınekterdi shyǵarý máselelerin talqylady. Esterińizge sala keteıik, kompanııa Qyzylorda qalasynda shyny zaýytyn salý jobasyn júzege asyrýda. Zaýyttyń qurylys-montaj jumystary sáýir aıynyń basynda aıaqtalady, al, maýsym aıynyń aıaǵynda turaqty óndiriske qosylmaq.
«Kelissóz nátıjeli boldy. Qazir biz Qyzylorda oblysynda álemdegi eń ozyq úlgidegi shyny zaýytyn salyp jatyrmyz. Búgingi kezdesýde jańa energııa, jańa úlgidegi úı qurylysyn júrgizýde áriptestikti nyǵaıtý máselelerin talqyladyq. Osy jyldar ishinde Qazaqstan Úkimeti bizdi udaıy qoldap keledi.Sondyqtan, áriptestikti odan ári nyǵaıtýǵa degen senimimiz arta tústi», - dep kompanııa prezıdenti Pen Shý málimdedi.
Odan bólek, Q.Kósherbaev Shıeli aýdanynda tamponajdyq sement zaýytyn salyp jatqan «Gejýba Grýpp Sement KO LTD» ("China Gezhouba Group Cement Co., Ltd") kompanııasynyń basshysy Lı Mın myrzamen kezdesti. Zaýyt qurylysy aǵymdaǵy jyldyń jeltoqsan aıynda aıaqtalady dep josparlanýda. Lı Mın «Qyzylorda oblysynda júzege asyrylyp jatqan joba zamanaýı ári barlyq ekologııalyq talaptarǵa saı» dep atap ótti.
Sondaı-aq, ınvestor qurylys sementin shyǵaratyn zaýyt salýǵa nıet bildirdi.
Oblys ákimi quramynda 102 kásiporyn bar "China Poly Group Corporation" memlekettik ınjenerlik-tehnologııalyq bıznes-tobynyń jumysymen da tanysty.
Beıjiń qalasynda, sondaı-aq, jobalaýshy kompanııalardyń qyzmetin tanystyratyn tanystyrylym uıymdastyryldy.
Sapar aıasynda Shenchjen qalasynda álemdik ınfokommýnıkasııalyq sheshimderdi jetkizýde jetekshi «Huawei Technologies Co., LTD» kompanııasymen memorandýmǵa qol qoıyldy. Memorandým Taraptardyń ózara is-qımyly men maqsattaryna, ásirese, aqparattyq jáne kommýnıkasııalyq tehnologııalardy damytý, «Sandyq Qyzylorda» baǵdarlamasy, atap aıtqanda, «smart city» - «aqyldy qala» jobasyn júzege asyrýǵa qol jetkizýine negiz bolmaq.
Odan bólek, Shanhaıda quqyq qorǵaý organdary men ákimdik ókilderi «Safe city» («Qaýipsiz qala») jobasymen tanysty.
«Qytaıdaǵy kelissóz barysynda joǵary tehnologııalyq ári eksportqa baǵyttalǵan joba boıynsha 6 naqty kelisimge keldik. Máselen, ol gadjetterge arnalǵan asa juqa áınekterdi shyǵarý boıynsha shyny zaýyty óndirisiniń ekinshi kezeńin salý. Elbasynyń Joldaýynda sıfrlandyrýǵa erekshe nazar aýdaryldy, sondyqtan, osy ónimdi shyǵarý ózekti másele bolyp tabylady. Jaqyn arada biz qytaılyq áriptestermen naqty kelisimge qol qoıamyz. Odan bólek, biz «smart city» jobalaryn júzege asyrý salasynda negizgi kásiporyndardyń biri «Huawei» kompanııasymen memorandýmǵa qol qoıdyq. О́zderińiz biletindeı, Elbasy Syrdarııanyń sol jaǵalaýynda jańa qala qurylysyn salýdy maquldady, bul joba «aqyldy qala» retinde júzege aspaq. Osy oraıda, Qyzylorda men Shenchjen qalalarynyń áriptestigi biz úshin óte mańyzdy. Oǵan qosa, osy baǵyttardyń barlyǵy jańa Joldaýda kórsetilgen, sondyqtan, bizdiń jumys saparymyz – Joldaýdy júzege asyrý boıynsha naqty sharalar dep bilemin», - dedi oblys ákimi Q.Kósherbaev.
