«Qurmetti forým qatysýshylary, «Jahandaný dáýirindegi sıfrlyq kún tártibi» forýmyna qosh keldińizder. Álemde jyldam ári túbegeıli tehnologııalyq ózgerister dáýiri bastaldy.
Tıimdi sıfrlandyrý sharalary ulttyq ekonomıkanyń qarqyndy damýy men halyqtyń ómir súrý sapasyn arttyrýdyń negizgi faktoryna aınalýda. Álemniń ozyq elderi, olardyń G-20 jáne Eýropalyq Odaq sekildi birlestikteri ózderiniń Sıfrlandyrý boıynsha strategııalyq qujattaryn qabyldady. Bizdiń Eýrazııalyq ekonomıkalyq odaq ta 2025 jylǵa deıingi Sıfrlyq kún tártibin qabyldady.
Búgingi Forým atalǵan kún tártibin iske asyrýdyń mańyzdy qadamy. Ortaq naryqtyń bolýy sıfrlandyrý máselelerinde birlesken tásilder men sharalardy ázirleýdi talap etedi. Kúshterdi jumyldyrý EýrazEQ-tyń tutastaı jáne ár eldiń jekeleı damýy úshin sınergetıkalyq tıimdilikti qamtamasyz etedi. Bul is-shara qajetti sheshimderdi ázirleýge jáne yntymaqtastyqty nyǵaıtýǵa yqpal etetinine senimdimin. Forýmnyń barlyq qatysýshysyna jemisti eńbek jáne alǵa qoıylǵan maqsattaryna qol jetkizýdi tileımin», — delingen Memleket basshysy N. Nazarbaevtyń hatynda.
Baqytjan Saǵyntaev baıandamasynda sıfrlyq kún tártibine baılanysty Qazaqstan tarapynan atqarylyp jatqan jumystarmen bólisti. «Biz sıfrlyq kún tártibinde osymen ekinshi jyl ómir súrip jatyrmyz. Qazaqstan elektrondy qyzmet kórsetýdi 10 jyl buryn bastady. Bizdiń maqsatymyz - memlekettik qyzmetterdiń 80 paıyzyn elektrondy formatqa kóshirý. Infraqurylym úshin Qazaqstan aýmaǵy óte úlken. Biz aýyldardy keń jolaqty ınternetpen qamtamasyz etýdi 2020 jylǵa deıin aıaqtaýdy josparlap otyrmyz. Halyqty sıfrlyq qyzmet túrine tartý kerek, ony qoldaný sánge aınalýy kerek. Biz mektep qabyrǵasynan matematıkter men baǵdarlamashylardy ázirlep, joǵary oqý oryndaryn osy salaǵa baǵyttap jatyrmyz. Innovasııa kerek, sol úshin biz sheteldik áriptestermen qarym-qatynas ornatamyz, ásirese sıfrlandyrý máselesinde birge áreket etý mańyzdy. Sóz joq, ár memleket ózinshe damıdy, degenmen, eń mańyzdysy - forýmnan keıin sıfrlandyrý salasynda yntymaqtasa alýymyzda bolyp otyr», - dedi Baqytjan Saǵyntaev.
Baıandamasynda Premer-Mınıstr elimizde tehnologııalyq kásipkerlikke jaǵdaı jasalyp otyrǵanyn aıtty. «EKSPO aýmaǵynda IT-hab jumysyn jarty jyldan keıin iske qosamyz. Ol týraly sheshim qabyldandy, zań shyǵaryldy. Aǵylshyn quqyǵyndaǵy Astana halyqaralyq qarjy ortalyǵy týraly konsıtýsııalyq zań qabyldandy, bizdiń IT-hab osy ortalyqqa qosyldy. Biz oǵan álemniń daryndy adamdaryn tartqymyz keledi. Sonymen qatar, biz kıberqaýipsizdik týraly umytpaýymyz kerek. EAEO máselesine kelgende biz kelisimdi ázirleý barysynda ekonomıka qurý salasynda ǵana ıntegrasııa ornatýǵa keliskenbiz. Biraq, ýaqyt óte kele biz shekaralardyń ashyqtyǵana jetemiz, sebebi, sıfrlyq platformada shekteý, shekara degen joq, osy oı meni jıi mazalaıdy», - dedi B.Saǵyntaev.
Aıta keteıik, forým Qazaqstan Prezıdenti Nursultan Nazarbaevtyń bastamasymen uıymdastyrylyp otyr. Forým jumysyna Armenııa, Belarýs, Qazaqstan, Qyrǵyzstan, Reseı, О́zbekstan jáne Tájikstannyń Premer-Mınıstrleri, sondaı-aq halyqaralyq birqatar IT kompanııalardyń ókilderi qatysýda.
