Sýretterdi túsirgen Orynbaı Balmurat
Is-shara Jerdiń alǵashqy jasandy seriginiń ushyrylýyna 60 jyl tolýyna oraı aýqymdy aksııanyń nátıjesinde júzege asyrylǵan.
Atalmysh aksııany byltyr Baıqońyr ǵarysh aılaǵynyń negizin qalaǵan G.Shýbnıkov atyndaǵy № 1 orta mektep oqýshylary bastaǵan bolatyn. Ony Qazaqstan Respýblıkasyna qarasty Baıqońyr qalasyndaǵy bilim berý mekemeleriniń oqýshylary qoldap, nátıjesinde baıqońyrlyq oqýshylar 5 myńnan astam sýret daıyndaǵan.
Keıinnen bir mezgilde eki quqyqtyq negizde qyzmet etetin «Baıqońyr» kesheniniń aıryqsha mártebesin eskere kele, balalar óz shyǵarmalaryn Qazaqstan jáne Reseı Prezıdentterine joldaýǵa sheshim qabyldaıdy. «Men eń aldymen atalmysh № 1 orta mektep basshylyǵyna rızashylyq tanytamyn. Osynaý bastamany alǵash kótergen ujymnyń oqýshylary búginde álem nazaryn ózderine jalt qaratqandaı. Birinshilik uǵymy alǵashqy jeńistermen sabaqtas bolyp tabylady. Búginde jas búldirshinderdiń ol shyǵarmalary Máskeýdegi Reseı Federasııasynyń Qoǵamdyq palatasynda kórsetilmek. Prezıdent V.Pýtınniń atyna joldanǵan 500-ge tarta sýretter kórme qonaqtarynyń qyzyǵýshylyǵyn arttyrady degen senimdemiz» deıdi Elbasy kitaphanasynyń mýzeıi dırektorynyń orynbasary Ámirhan Rahymjanov. Kórmeniń ashylý saltanatyna balalar kórkemóner mektebi – IýNESKO klýbynyń dırektory Gúlzııa Isenova jáne Raıymbek batyr atyndaǵy №50 «Qazǵarysh» mektep-lıseıiniń oqýshylary qatysty.
Búgingi kórme joǵarydaǵy bes myń sýrettiń ishinen iriktelip alynyp, Elbasymyz N.Nazarbaevqa jiberilgen 200 sýret toptamasymen ashyldy. Balalardyń barlyq shyǵarmalary bir aı boıy «Balalyq shaqtan kózqaras» jobasy aıasynda atalmysh Mýzeıde ótkiziletin kórkemsýret kórmesinde qalyń jurtshylyqqa usynylmaq.
Mıras ASAN,
«Egemen Qazaqstan»
