Kezdesý barysynda Qazaqstan Prezıdentine Ulttyq banktiń 2017 jyly atqarǵan jumysynyń qorytyndysy jónindegi esebi usynyldy.
Danııar Aqyshev Elbasyǵa Ulttyq banktiń qazirgi qyzmeti, aqsha-nesıe saıasatynyń basty baǵyttary, sondaı-aq elimizdiń qarjy naryǵyndaǵy ahýal týraly baıandady.
Ulttyq bank tóraǵasynyń esebine sáıkes, 2017 jyly ınflıasııa deńgeıi 7,1 paıyzdy qurap, jyl sońynda altyn-valıýta qorynyń kólemi 30,7 mıllıard AQSh dollaryna jetken.
– Qańtar aıynda ahýal odan da jaqsara tústi. Bank rezervteri taǵy 3 paıyzǵa ósip, 31,7 mıllıard AQSh dollaryna jetti. Ulttyq qordyń shetel valıýtasyndaǵy aktıvteri 58,3 mıllıard AQSh dollaryn qurady. 2018 jylǵy qańtarda ınflıasııa deńgeıi 0,6 paıyz boldy. Bul bizdiń bıylǵa belgilegen – besten jeti paıyzǵa deıingi aralyqtaǵy jańa ólshemimizge enip otyr, – dedi D.Aqyshev.
Kezdesý qorytyndysy boıynsha Memleket basshysy birqatar naqty tapsyrma berdi.
