Jýyrda kolledjimizde osy mindetti júzege asyrýǵa qatysty oqytýshylar men stýdentterdiń basqosýyn ótkizip, biraz jyldan beri iske asyp kele jatqan jumystarymyzdy pysyqtadyq. Ásirese, tehnıka tilin túsiner jastardy qalaǵan mamandyǵyna daıyndap, jumysqa ornalasýyn oılastyrýdamyz. Bul iste damyǵan memleketter sanalatyn Japonııa, Koreıa elderiniń jumysshy mamandaryn oqytý tájirıbesin basshylyqqa alýdamyz. Sonymen qatar bilim berý men tájirıbeni eńbek alańynda paıdalaný joldaryn qarastyrýdamyz.
Joldaýda memleket baılyǵy adamı kapıtal ekeni de aıtyldy. Adamı kapıtal – jastar, zamanǵa saı tehnıkalyq mamandyqqa ıek artyp, aldymen óz ómir jolyna, odan keıin eldiń ál-aýqatyn damytýǵa jumsap jatsa, utylmasymyz anyq. Shyny kerek, Otanymyz bilim salasyna qyrýar qarjy bólip otyr. Árbir mamandyqty tolyq ıgerip shyǵý úshin jastardyń teorııalyq bilimin tájirıbede ushtaý – basty mindet. Elbasy bul rette «Qazir tehnıkalyq mamandyqtardyń, ǵylym men ınnovasııanyń kúni týǵan zaman. Erinbeı eńbek etken adamnyń ómir sapasy ozady, turmysy jaqsy bolady. Eń aqyry búgingi jasap jatqan jaqsylyqtarymyzdyń barlyǵy – jastar bolashaǵy úshin», degen edi. Osy senimnen shyǵýdyń basty joly –tórtinshi ónerkásiptik revolıýsııany múltiksiz júzege asyrý dep bilemiz.
Bilim ordamyzdyń tarıhyna kóz júgirter bolsaq, irge kótergeli beri alpys jyldan asypty. Osy ýaqyt ishinde myńdaǵan kásiptik maman ázirledik. Ýaqyt ólshemine qaraı stýdentter qazir túske deıin teorııalyq bilim alsa, tústen keıin sol bilimdi tájirıbe alańdarynda kózben kórip, qolmen iske asyrady. Bul dýaldy oqytý júıesi boıynsha oryndalýda. О́zimiz jıi aıtatyn órkenıetti elderde dýaldy oqytý baıaǵyda-aq sheshimin tapqan. Olarda bilim mekemesi men óndiris orny qatar ornalasady. Biz de osy tásilge qol jetkize bastadyq. Kolledj qaladaǵy óndiris mekemeleri men aýyldy jerlerdegi kooperatıvtermen tyǵyz baılanys ornatqan. Oǵan deıin stýdentter kúndelikti teorııalyq bilimdi kolledj aýmaǵyndaǵy ár mamandyqqa arnalǵan shaǵyn óndiris oryndarynda atqarady. Ony keıde stýdentter «О́z tehnıka parkimiz» dep júr.
Bilim berý baǵdarlamalaryndaǵy negizgi basymdyq ózgeristerge únemi beıim bolý jáne jańa bilimdi meńgerý qabiletin damytý bolýy tıis. Sol sekildi oqytýdyń mazmundylyǵy zamanaýı-tehnıkalyq turǵydan qoldaý arqyly úılesim tabý jaǵy da zor mańyz atqarady. Sıfrly bilim berý resýrstaryn damytý, keń jolaqty ınternetke qosý jáne mektebimizdi beınequrylymdarmen jabdyqtaý jumystary da jan-jaqty oılastyrylǵan. Munyń bári otandyq bilim berýdi damytýdyń 2011-2020 jyldarǵa arnalǵan memlekettik baǵdarlamasy aıasynda júrgizilip, básekege tótep berý, sol arqyly naryq talabyn tereń meńgerý el ekonomıkasyn óristetýge jastardyń úles qosýyn basty nazarda ustaý bolyp esepteledi. Ásirese, bir profıldi mamandyqtardy bilim baǵdarlamalaryna sáıkestendirý, dýaldy oqytý júıesin jetildire berý ózekti.
Biz Elbasy Joldaýyndaǵy mindetterdi júıeli oryndaý isinde keıbir mamandyqtardyń aýqymyn keńeıtip, ómirsheńdigin arttyrýǵa kúsh salyp otyrmyz. Jasyratyny joq, mamandyq ómir talabyna saı bolmasa, túlegiń jumyssyz qalary sózsiz. Qazir suranysqa ıe mamandyqtar qatarynda úıler men ǵımarattar salý jáne paıdalaný, óndiristik elektr-mehanıkalyq jabdyqtar, jıhaz óndirisi jáne ishki sanıtarlyq-tehnıkalyq qurylǵylar, jeldetkishterdi jáne ınjenerlik júıelerdi paıdalaný, sáýlet, qysh óndirisi, taǵy basqalary bar. Bul mamandyqtarǵa kolledj biraz jyldan beri ázirlep kele jatyr. Olar oqı júrip, bolashaqta jumys isteıtin mekemelerin qazirden bastap aıqyndap alady. Bul – suranysqa saı maman daıyndaý. Kolledj ujymy aldaǵy ýaqytta da osy qadamyn jalǵastyryp, dáýirge saı kadr daıyndaýdy iske asyra bermek.
Orynbaı QÝANYShBAEV,
S.Ysqaqov atyndaǵy Qyzylorda qurylys jáne bıznes kolledjiniń dırektory
