2-4 aqpan kúnderi elimizdiń tennısshi jigitteri azýyn aıǵa bilegen Shveısarııa quramasyn jeńip, Otan abyroıyn taǵy bir márte asqaqtatty.
Shveısarııa quramasy Astanaǵa óz eliniń hám álemniń úzdik tennısshileriniń biri jáne biregeıi Rodjer Federer men Sten Vavrınkany ákelmese de halyqaralyq týrnırlerde ábden ysylǵan, tájirıbeli oıynshylarymen kelgen-di. Sportshylarymyz ózge eldiń quramalary sekildi Qazaqstannyń da álemdik deńgeıde oınaı alatynyn dáleldep berdi.
Dál osy týrnırdiń 2010 jylǵy básekesiniń pleı-off kezeńinde Shveısarııany Vavrınka sekildi úzdik tennısshisi oınaǵan kezde de 5:0 esebimen tas-talqan etip utqanymyzdy jankúıerler áli umyta qoımaǵan shyǵar. Sol jyly Rodjer Federerdiń otandastaryn jeńip qana qoımaı, Devıs kýbogynyń álemdik tobyna shyqqan edik. Mine, arada segiz jyl ótkende azýly qarsylasymyzdy taǵy da jeńip, álemdik synnyń shırek fınalyna joldama alyp otyrmyz.
Qazaqstan sportshylaryna bul jeńis ońaı kelgen joq. Táýelsizdik alǵannan beri Elbasynyń árdaıym sportqa kóńil bólýiniń, udaıy qoldaý kórsetip kele jatqanynyń arqasynda oǵlandarymyz osyndaı aıtýly jeńiske jetip otyr.
Sondaı-aq Slovenııada fýtzaldan Eýropa chempıonatynyń «V» tobynda synǵa túsip jatqan Qazaqstan quramasynyń fýtzalshylary óz tobynda birinshi orynmen shırek fınalǵa shyqty. Bul 2016 jylǵy birinshiliktegi nátıjemizdi jaqsartýǵa taǵy bir tamasha múmkindik. Eki jyl buryn otandastarymyz úshinshi oryn ıelengen bolatyn.
Sóıtip bul sańlaqtarymyz tórge ozǵan kún boldy.
Álı BITО́RE,
«Egemen Qazaqstan»
