Búginde Baıanaýyldyń jazǵy-qysqy týrızm áleýeti tańǵalarlyqtaı. Shaǵyn avıasııaǵa arnalǵan aerodrom da salynyp jatyr. Infraqurylym degenińiz keremet, aýdan boıynsha 45 shaqyrymǵa jaryqtandyrý jelisi tartylyp, 1700 jaryq baǵana ornatylyp, 2000-nan astam sham qoıylypty. Týrısterdi qarsy alýǵa daıyn. Alaıda uıaly baılanys aıasynan tys qalǵan aýyldar renishti.
Kózben kórgenimizdi aıtaıyq. Biz jolsaparmen barǵanymyzda Aqsań aýyly uıaly baılanysqa da, keń jolaqty ınternetke de qosylmaǵanyna kýá boldyq. Aýyl aýdan ortalyǵynyń irgesinde ornalasqan, 1 myńǵa jýyq halyq turady. Dál janynda Myrzashoqy degen shańǵy kesheni salynyp jatyr. Bul qurylysqa 350 mıllıon teńge jumsalǵan kórinedi. Aýyldyqtardyń aıtýynsha, Myrzashoqy taýyna deıin qosymsha elektr júıesi tartylypty. Al Aqsańda qys aılarynda, tipti jazda da elektr jaryǵy táýliktep sónip qala beredi. Sondyqtan turǵyndar bılikten qosalqy stansa ornatyp berýdi surap otyr.
Aýdandyq turǵyn úı-kommýnaldyq sharýashylyq bóliminiń málimetinshe, uıaly baılanystyń tartylmaýyna sebep – aýyldardaǵy turǵyndar sanynyń azaıýy. Halyq sany 500-den asqanda uıaly baılanys jelisi ornatylady.
– Baılanys joq emes, bar. Barlyq aýylda burynnan beri tartylǵan úı telefondary qosylýly,– deıdi olar.
Aýyldardyń halqy uıaly baılanysqa qosylý jaıly ótinishterin Aqparat jáne kommýnıkasııalar mınıstrligine de joldaǵan. Oblystyq «Saryarqa samaly» gazetiniń tilshileri de másele kótergen. Nátıjesinde ótken jyly aýdanda «KaR-Tel» JShS Beeline uıaly baılanys jelisin tartýdy bastapty. Qazir aýdandaǵy 38 aýyldyń 31-i uıaly baılanysqa qosylypty. Shalǵaıdaǵy Qundykól jáne Jumat Shanın aýyldaryna endi uıaly telefon arqyly habarlasa alasyz. Qarajar, Birjankól, Kókdombaq, Qoıtas, Aqshı, Uzynbulaqtyń Aqshıi, Myńbulaq aýyldaryn baılanysqa qosý úshin uıaly telefon operatorlaryna qosymsha hat joldanypty. Jańajol, Jeltaý, Kúrkeli aýyldyq okrýgteri de uıaly baılanystyń qosylýyn asyǵa kútýde. Bul jerlerde aýdan boıynsha mal baǵatyn 444 sharýa qojalyǵy, 25 otarly mal fermasy bar.
Aýyl halqy alystaǵy aǵaıyn, stýdent balalarymen baılanysý úshin uıaly telefonnyń qolaıly ekenin aıtady. Zamanǵa saı ózge elderden qalǵylary kelmeıdi. Ozyq ýaqyttyń ozyq jańalyǵy aýylǵa da qoljetimdi bolsa deıdi. Al bılik qarapaıym aýyl halqynyń týǵan jerdiń taý-tasyn, kólderin saqtap, týrızm órkendeıtin aýmaqta turyp jatqanyn eskerse ıgi.
Farıda BYQAI,
«Egemen Qazaqstan»
Pavlodar oblysy,
Baıanaýyl aýdany
