HOK 2016 jylǵy Rıo Olımpıadasynyń eki kezdesýiniń kúmándi nátıjesinen keıin osyndaı oıǵa kelgen. Onyń birinshisi qazaqstandyq Vasılıı Levıt pen reseılik Evgenıı Tıshenko jekpe-jegi bolsa, ekinshisi reseılik Vladımır Nıkıtın men ırlandııalyq Maıkl Konlan aıqasy.
«Biz AIBA-nyń basqarý isine alańdap otyrmyz. HOK-tyń atqarýshy komıteti Halyqaralyq áýesqoı boks qaýymdastyǵynyń (AIBA) basqarýshylyq, qarjylyq, tóreshilik jáne dopıng máseleleri jaıly esep bergenine kóńili tolmaıdy. Sondyqtan HOK Býenos-Aıreste ótetin jastar arasyndaǵy Olımpıada men 2020 jyly Tokıoda uıymdastyrylatyn jazǵy Oıyndarǵa boksty engizý týraly isti qaraýǵa quqy bar.
О́z ýaqytynda biz AIBA-dan kúmán týdyrǵan jekpe-jekterdiń eseptemesin aldyq. Al tóreshilik isi jeltoqsan aıynda qabyldaǵan sheshimderimizdiń bir sebebi bolyp otyr. Biz tóreshilik týraly neǵurlym kóbirek málimet suratqan edik, áli de suratyp otyrmyz. Osyǵan qatysty kóńil tolarlyqtaı aqparat alǵymyz keledi», dedi Tomas Bah.
Aıta keteıik, 2016 jylǵy Olımpıada oıyndarynda Levıt-Tıshenko aıqasynda tóreshiler biraýyzdan jeńisti reseılikke bergen. Biraq mundaı sheshim kópshilikti tań qaldyryp, jurt talqysyna túsken bolatyn. Jeńimpazdardy marapattaý kezinde de kórermender narazylyqtaryn bildirip, ysqyryp turdy.
О́tken jyldyń sońyna taman AIBA prezıdenti Chıng-Kýo Výǵa birqatar aıyp taǵylǵannan keıin qyzmetinen qýylǵan bolatyn. Oǵan sybaılas jemqorlyqqa jol berdi, qarjyny orynsyz ıgerdi degen aıyptar taǵyldy. Chıng-Kýo Vý AIBA-ny 11 jyl basqardy.
Al 28 qańtar kúni AIBA-prezıdent laýazymyna ózbekstandyq Ǵafýr Rahımov saılandy.
