Jańadan engiziletin ózgeristerge sáıkes, páterler men basqa da ǵımarattardyń ıelerine basqarýdyń tek eki túri usynylady: MIB jáne kondomınıým.
– MIB – kondomınıým nysandaryndaǵy adamdar nemese qyzmet kórsetý sýbektilerimen bir kireberistiń atynan kelisimshart jasasatyn jalǵyz adam bolýy múmkin, – deıdi qalalyq turǵyn úı qatynastary bóliminiń mamany Erkebulan Besjigitov.
– Bul qurylym da turǵyn úı kireberisin jınaý men jóndeý boıynsha qyzmet kórsetedi. Páter ıeleri kooperatıvteri basqarý túri retinde jańa talaptarmen úndese almaı otyr. Ár PIK-tiń óz santehnıgi, eden jýýshysy men aýla sypyrýshysy bar, bul durys emes. Qyzmet túrlerin olar ózderi kórsetip, ózderi qadaǵalaıdy. Iаǵnı atqarǵan jumystary shala-sharpy bolǵan kúnniń ózinde olarǵa syn aıtyp, yqpal etý qıyn. Al MIB-ter servıstik kompanııalarmen shartqa otyryp, onyń oryndalý barysyn qadaǵalap otyratyn bolady.
Kezdesýge qatysýshylardyń deni PIK-terdiń, onda jumys isteıtin adamdardyń endigi kúıi ne bolady dep alańdaýly. Olar ıgere almaǵan jumystar kólemin jańa qurylym júzege asyra ala ma? Jumyssyzdyqpen kúres onsyz da mandymaı jatqanda bul jańalyq kommýnaldyq qyzmet mamandaryn nápaqasynan qaqpaı ma? Basqa máselelerdi aıtpaǵanda, MIB-ter qujattamalardy durys júrgize ala ma?
Úıler men ınjenerlik toraptarǵa qyzmet kórsetýdi úılestirýshi Baqytjan Táýeshovtiń aıtýynsha, kópshilik olar kórsetip otyrǵan qyzmetke razy.
– Bizdiń servıstik kompanııada tarıf meılinshe tómen, – deıdi ol. – Halyq kóp qabatty úıdiń shatyryn jóndeý sııaqty kúrdeli de qymbat jumystar úshin aqy tóleýge daıyn emes. Sondyqtan biz elektrmen, sýmen qamtamasyz etý, sýaǵar jelilerdi qalypta ustaý mindetin moınymyzǵa aldyq. Qyzmetimiz ben jumysymyzdyń barysy, olardyń tólemaqysy týraly turǵyndarmen kezdesýlerde aqyldasyp otyramyz.
Jasyratyny joq, PIK ókilderi jańa qurylymnyń engizilýine úzildi-kesildi qarsy. Munyń bári bos áýreshilik, onyń ústine turǵyn úılerdiń kópshiligi ábden eskirgen desedi olar.
Kezdesýdiń sheshimdi sózin Qaraǵandy oblystyq kásipkerler quqyn qorǵaý jónindegi keńesiniń tóraǵasy Serik Tóregeldın aıtty.
– Servıstik uıymdardyń qyzmetin salǵan betten joqqa shyǵarýǵa bolmaıdy, – dedi ol. – Olardyń da jumys isteýge quqy bar. Servıstik qyzmettiń damýyna tosqaýyl bola almaımyz. Sizderdiń qurylymdaryńyzdy birden jaýyp tastaıyn dep otyrǵan da eshkim oq. О́zine ońtaıly qyzmetti halyq ózi tańdap alady.
Qaırat ÁBILDA,
«Egemen Qazaqstan»
